"Putin saziş bağlamalıdır. O, razılaşmaya getməməklə Rusiyanı məhv edir..."- Tramp

Bizi sosial şəbəkələrdən izləyin:

"Düşünürəm ki, Rusiyanın böyük problemləri olacaq – onların iqtisadiyyatına baxın, Rusiyadakı inflyasiyaya baxın..."

Bazar ertəsi ABŞ prezidentinin rəsmi səlahiyyətlərini öz üzərinə götürən Donald Tramp Vladimir Putinlə görüşmək və Ukraynadakı müharibəni tez bir zamanda dayandırmaq niyyətində olduğunu bildirib.

Moderator.az xəbər verir ki, "Ukrinform"-un yazdığına görə, bu barədə o, jurnalistlərə Oval kabinetdə fərmanlar imzalayarkən bildirib.

Tramp jurnalistlərin belə bir görüşün mümkünlüyü ilə bağlı suallarına cavab olaraq “Prezident Putinlə görüşəcəyəm” deyib.

Eyni zamanda, Ağ Evin rəhbəri qeyd edib ki, bunun dəqiq nə vaxt baş verəcəyi barədə danışa bilməz. Lakin sonradan bunun çox tez baş verə biləcəyini qeyd edib.

Ukraynada müharibəni necə bitirməyi planlaşdırdığı ilə bağlı suala cavab olaraq ABŞ prezidenti qeyd edib: “Biz bunu mümkün qədər tez etməyə çalışırıq”. Eyni zamanda Tramp bir daha öz mövqeyini bildirib ki, bu müharibə heç vaxt başlamamalı idi.

Daha sonra jurnalistlər münaqişənin sona çatmasının nə qədər vaxt aparacağını dəqiqləşdirməyə çalışarkən Tramp qeyd edib ki, əvvəlcə Putinlə danışmalıdır.

“Biz öyrənməliyik. O, (müharibədən – red.) sevinə bilməz, işlər onun üçün o qədər də yaxşı getmir”, – ABŞ prezidenti bildirib.

Onun sözlərinə görə, çoxları müharibənin bir həftəyə bitəcəyini düşünürdü, lakin bu, üç ilə yaxın davam etdi.

Tramp qeyd edib ki, həm Rusiya, həm də Ukrayna tərəfində çoxlu insan həlak olub, ona görə də “bu müharibəni bitirmək çox yaxşı olardı”.

O, həmçinin Vladimir Zelenskinin müharibəyə son qoymaq üçün saziş bağlamaq istədiyinə əminliyini ifadə edib. ABŞ prezidentinin sözlərinə görə, Putinin bunu istəyib-istəməməsi məlum deyil.

“O (Putin – red.) müqavilə bağlamalıdır. Hesab edirəm ki, o, sövdələşməyə getməməklə Rusiyanı məhv edir.

Düşünürəm ki, Rusiyanın böyük problemləri olacaq – onların iqtisadiyyatına baxın, Rusiyadakı inflyasiyaya baxın”, – Ağ Evin yeni rəhbəri qeyd edib.

Eyni zamanda, Tramp Putinlə yaxşı ümumi dil tapa biləcəyini qeyd edib və onun sonunda müqavilə bağlamağa razılaşacağına ümid etdiyini bildirib