"ABŞ Ukraynaya dəstək planının məxfi hissəsini açıqlayıb" - "The New York Times"

Bizi sosial şəbəkələrdən izləyin:

"PUA-lar Ukraynadakı döyüşlərdə getdikcə daha vacib rol oynayır və gələcək döyüşlərdə də əsas rol oynayacaq..."

ABŞ-ın Ukraynaya verdiyi dəstək müharibəyə "həqiqi strateji təsir" göstərib. Söhbət Ukraynada pilotsuz uçuş aparatlarının (PUA) istehsalına başlamaq və genişləndirmək üçün dəstək olaraq həyata keçirilən investisiyalardan gedir.

Moderator.az xəbər verir ki, bu barədə "The New York Times" nəşri yazıb.

Qeyd edilir ki, ABŞ prezidenti Co Bayden administrasiyası Ukraynanın pilotsuz uçuş aparatlarının hərbi sənayesinin inkişafına necə kömək etdiyinə dair məlumatları açıqlayıb.

Belə ki, ABŞ rəsmiləri sayca üstün və daha yaxşı təchiz olunmuş Rusiya ordusuna qarşı mübarizə aparan Ukraynayda PUA istehsalına başlamaq və genişləndirmək üçün böyük investisiyalar yatırıb. Xüsusilə vurğulanır ki, ABŞ ötən ilin sentyabrında Ukraynada PUA istehsalını artırmaq üçün 1,5 milyard dollar xərcləyib. Bu, indiyə qədər "kölgədə" qalan ABŞ hərbi dəstəyinin bir hissəsidir.

Vurğulanır ki, dəstək Ukraynaya yeni nəsil pilotsuz uçuş aparatlarının hazırlanması və müharibə aparılmasında inqilabi metodların inkişafı üçün maddi yardımlar və kəşfiyyat əməkdaşlarının göndərilməsini əhatə edib. ABŞ Amerika texnologiya şirkətləri ilə Ukrayna dron istehsalçıları arasında əlaqələrin qurulmasına kömək edib və istehsalçılara ehtiyat hissələrinin alınmasında dəstək verib.

ABŞ milli təhlükəsizlik müşaviri Ceyk Sallivanın sözlərinə görə, bu dəstək müharibəyə "həqiqi strateji təsir" göstərib: "Biz gördük ki, pilotsuz uçuş aparatları Ukraynadakı döyüşlərdə getdikcə daha vacib rol oynayır və gələcək döyüşlərdə də əsas rol oynayacaq." Onun sözlərinə görə, PUA-lardan istifadə səyləri Ukraynanın 2022-ci ilin payızındakı ilk əks-hücumundan sonra başlayıb və ikinci əks-hücum hazırlığı zamanı intensivləşib.

"The New York Times"ın ABŞ rəsmilərinə istinadən qeyd etdiyi kimi, ABŞ-ın investisiyaları Ukrayna pilotsuz uçuş aparatlarını daha təsirli və ölümcül edib. Bu dronlar Rusiyanın Qara dəniz donanmasının dörddə birini məhv edib və onun

Ukraynanın şərqində irəliləməsini ləngitməyə kömək edib.

Döyüş meydanındakı uğursuzluqlar Ukraynanın PUA istehsalçılarına dəstəyin həcminin və sürətinin artırılmasına səbəb olub. Maliyyə yardımı ilə yanaşı, Bayden administrasiyası Kiyevə bu sahə üçün zəruri texnologiyalara ixtisaslaşmış Amerika şirkətləri ilə əlaqələr qurmağa kömək edib.

2024-cü ilin payızında Pentaqon Ukraynaya PUA istehsalı üçün 800 milyon dollar ayırıb. Prezident Vladimir Zelenskinin Ağ Evə səfəri zamanı prezident Co Bayden əlavə olaraq dronların yaradılması üçün 1,5 milyard dollar ayırmağı vəd edib. Amerikalı rəsmilərin fikrincə, bu investisiyalar Ukraynanın pilotsuz uçuş aparatlarının effektivliyini artırıb.