"Britaniya və Fransa Ukraynaya sülhməramlıların göndərilməsini müzakirə edir" - "The Telegraph"

Bizi sosial şəbəkələrdən izləyin:

"Qərb qoşunlarının Ukrayna ilə Rusiya arasında sərhəd boyunca yerləşdirilməsi və demilitarizasiya edilən bufer zonanın yaradılması ideyası nəzərdən keçirilir..."

Böyük Britaniya baş naziri Kir Starmer və Fransa prezidenti Emmanuel Makron müharibənin mümkün atəşkəs razılaşmasından sonra Britaniya və Fransa əsgərlərini Ukraynaya sülhməramlı missiya çərçivəsində göndərmək ideyasını nəzərdən keçirir.

Moderator.az xəbər verir ki, bu barədə "The Telegraph" nəşri öz mənbələrinə istinadən məlumat yayıb.

Fransa prezidenti bu yanaşmanı dəstəkləyir və artıq bunu Ukrayna prezidenti Vladimir Zelenski və Polşa baş naziri Donald Tuskla müzakirə edib.

Dauniq Street və Yelisey Sarayı nümayəndələri bu mövzunun keçən həftə Çekersidəki görüş zamanı müzakirə edildiyini təkzib etməsələr də, danışıqların detalları məxfi saxlanılır.

Britaniya hökumətindəki bir mənbə bildirib: "Bizim dəstək verə biləcəyimiz şeylər, dəstək vermək istədiyimiz şeylər və bu qoşunların hansı təhdidlər altında ola biləcəyi, eləcə də bunun eskalasiya olub-olmaması ilə bağlı problemlər var".

Sülhməramlı missiyanın perspektivləri

Vaşinqton, London və Parisdə müxtəlif ssenarilər nəzərdən keçirilir. Xüsusilə, ideyalardan biri Qərb qoşunlarının Ukrayna ilə Rusiya arasındakı sərhəd boyunca yerləşdirilməsi və demilitarizasiya edilmiş bufer zonanın yaradılmasıdır.

Fransa prezidenti Avropa ölkələrinin bu prosesdə əsas rol oynamalı olduğunu təklif edib. Vladimir Zelenski ilə söhbətində Makron vurğulayıb: "Biz əsas müttəfiqlərlə sülhə nail olmaq və effektiv təhlükəsizlik zəmanətlərinin işlənməsi üçün sıx əməkdaşlıq etməyi razılaşdırmışıq."

Lakin Böyük Britaniyada hələlik yekun qərar qəbul olunmayıb. Britaniya rəsmiləri xəbərdarlıq edirlər: "Biz bir qədər tələsirik, biz hələ orada deyilik".

Hər hansı qoşun yerləşdirilməsi Rusiyanın sərt reaksiyasına səbəb ola bilər və Britaniyanın müdafiə büdcəsinə əlavə yük gətirə bilər. Bundan əlavə, bu, münaqişənin eskalasiyası kimi qəbul edilə bilər ki, NATO ölkələrinin hökumətləri bu cür vəziyyətdən qaçmağa çalışır.

Ukraynada sülhməramlı qoşunların yerləşdirilməsi: son xəbərlər

Bundan öncə xəbər verilib ki, Ukrayna Konstitusiyası xarici hərbi birləşmələrin ölkə ərazisinə daxil olmasına və sülhməramlı funksiyalar yerinə yetirməsinə icazə verir. Xalq deputatı Fyodor Venislavski onların necə qəbul edilə biləcəyini izah edib.

Bundestaqın deputatı, Xristian-Demokrat İttifaqının üzvü Roderix Kizevetter hesab edir ki, Almaniya Ukraynadakı vəziyyətə "yaxşı təchiz olunmuş qoşunlarla" müvafiq zamanda müdaxilə etməlidir.

Almaniya vətəndaşlarının əksəriyyəti Ukraynada sülhməramlı missiya ideyasını dəstəkləyib. Respondentlərin 56 faizi atəşkəs əldə olunacağı təqdirdə Ukraynada beynəlxalq sülhməramlı missiyanın yerləşdirilməsi ideyasını dəstəkləyib. Respondentlərin 19 faizi sülhməramlıların göndərilməsinə prinsipial olaraq qarşı çıxıb, 25 faizi isə bu mövzuda fikrini bildirməyib.