İran Suriyadakı kürdlərə dəstək verməklə Türkiyə ilə savaşmaq istəyir

Bizi sosial şəbəkələrdən izləyin:

"Məqsəd regionda sabitliyin pozulması və Türkiyənin sərhəd bölgələrində hərbi fəaliyyətinə qarşı çıxmaqdır..."

İran Suriyadakı kürd təşkilatı PKK/YOG-yə1500 pilotsuz uçuş aparatı (PUA) təhvil verməyi planlaşdırır.

Moderator.az xəbər verir ki, bu barədə Türkiyənin "Yeni Şafak" qəzeti yazıb.

Məlumata görə, bu anlaşma regionda sabitliyi pozmaq və Türkiyənin sərhəd bölgələrində hərbi fəaliyyətinə qarşı çıxmaq məqsədi daşıyır.

Xəbərlərə əsasən, İran və kürd təşkilatının nümayəndələri arasında danışıqlar İraqdakı bazarlardan birində keçirilib. Görüş zamanı

PKK/YPG 2000 PUA tələb etsə də, İran yalnız 1500-nü təmin edə biləcəyini bildirib.

Razılaşmaya baxmayaraq, Türkiyə tərəfinin diqqətli nəzarəti səbəbindən dronların Suriyaya daşınması gecikir. Türkiyə bu cür daşınmaların qarşısını almaq üçün hər hansı cəhdi önləməyə hazır olduğunu vurğulayıb.

Türkiyənin təzyiqi altında kürdlər alternativ strategiyalar tətbiq etməyə başlayıb. Bildirilir ki, onlar dronların aşkar edilməsini çətinləşdirmək üçün onları hissə-hissə daşımağı planlaşdırır. Lakin bu taktikanın effektivliyi Türkiyənin sərhəd zonasında apardığı ciddi nəzarət səbəbindən şübhə altındadır.

İŞİD-in yenidən ortaya çıxması təhlükə törədir

İsrailin "Maariv" qəzeti yazır ki, İran və PKK/YPG arasındakı anlaşma xəbərləri fonunda Suriyada İŞİD-in terror özəklərinin yenidən fəallaşdığı müşahidə olunur.

Suriyalı siyasi analitik Əbdül Rəhman vurğulayıb ki, bu, İŞİD-in 2018-ci ildən bəri Dəməşq ətrafında ilk dəfə görünməsidir. Onun sözlərinə görə, bu fəaliyyətin bərpası regionun təhlükəsizliyi üçün ciddi təhdiddir.

Əbdül Rəhman əlavə edib ki, Əsəd rejimi dövründə yığılan silah ehtiyatları gizli saxlanılır və "gec partlayan bomba"ya çevrilə bilər. Bu silahlar xarici qüvvələr, o cümlədən İranla əlaqələri olan terror özəklərinə potensial dəstək ola bilər.

İranın gərginliyin artırılmasında rolu

Suriya İnsan Hüquqları Monitorinq Mərkəzi bildirir ki, İran İŞİD-in özəklərindən Suriyada gərginliyi artırmaq üçün istifadə edə bilər. Partlayışlar və terror aktları kimi addımlar məzhəb ziddiyyətlərini dərinləşdirmək və xaos yaratmaq məqsədini daşıyır.

Suriyadakı vəziyyət son dərəcə qeyri-sabit olaraq qalır. İŞİD özəklərinin müxtəlif bölgələrdə yayılması və İran kimi xarici qüvvələrin müdaxiləsi ölkədəki kövrək balansı poza bilər. Bu, keçid prosesinə zərər vura və təhlükəsizlik sahəsindəki onsuz da çətin olan vəziyyəti daha da ağırlaşdıra bilər.

Beləliklə, region ikiqat təhlükə ilə üz-üzədir: bir tərəfdən İranın kürd təşkilatları ilə əməkdaşlığı, digər tərəfdən İŞİD-in yenidən canlanması qorxu yaradır və sabitliyi pozur.