"Putinin yeganə hörmət etdiyi amil gücdür" - Kurt Volker

Bizi sosial şəbəkələrdən izləyin:

"Tramp güc nümayişini davam etdirməli və Ukraynanı möhkəm mövqeyə gətirməlidir..."

Ukrayna dərhal NATO-ya üzv olmaqda israr etməlidir, çünki bu, Rusiyanın təcavüzünü dayandıra biləcək yeganə amildir.

Moderator.az xəbər verir ki, bu barədə ABŞ-ın Ukrayna məsələləri üzrə keçmiş xüsusi nümayəndəsi Kurt Volker "LIGA.net" nəşrinə müsahibəsində bildirib.

"Biz Ukraynanın NATO-ya necə və nə vaxt daxil olacağı barədə daimi müzakirələr eşidirik. Düşünürəm ki, hamı bilir ki, bu, Putinin yeganə hörmət etdiyi nəsnədir. O artıq başa düşüb ki, Budapeşt Memorandumu kimi təminatlar işləmir və ciddiyə alınmır", - Volker qeyd edib.

O əlavə edib ki, bu məsələdə tələblər "dərhal" olmalıdır. "Düşünürəm ki, atəşkəs elan olunandan, döyüşlər dayandırılandan dərhal sonra biz Ukraynanı NATO-ya qəbul etməliyik. Bu, yeni təcavüzün qarşısını almaq üçün vacibdir", - Volker vurğulayıb.

O, ABŞ-ın yeni seçilmiş prezidenti Donald Trampın Ukrayna və Rusiya məsələləri üzrə xüsusi nümayəndəsi Kit Kellogun Trampın Ukraynadakı müharibəni bir neçə ay ərzində bitirə biləcəyi barədə bəyanatını şərh edib.

"Düşünürəm ki, bu, realdır. Əsas səbəb isə odur ki, Putinin iqtisadiyyatı çox pis vəziyyətdədir. Onlarda inflyasiya 30 faizdən çoxdur, faiz dərəcələri 21 faizi keçir, işçi qüvvəsi çatışmazlığı və büdcə kəsiri var. Onlar ehtiyatlarını tükəndirir. Neft və qaz qiymətləri enərsə, dövriyyədə olan pulları daha da azalacaq. Ordunu gücləndirməkdə çətinlik çəkirlər. Putin bunu bilir, amma indi sülhə hazırlaşmaq üçün sərt görünməyə çalışır. Buna görə də mən 2025-ci ildə müsbət dəyişikliklər olacağını gözləyirəm", - Volker bildirib.

Onun sözlərinə görə, Tramp müharibəni qısa müddətdə bitirmək üçün əsl qətiyyətə malikdir. "Gələcəkdə Ukraynaya yardım və silahlar məsələsinə gəlincə, hər şey prezident Trampın Ukraynaya hərbi dəstəyi davam etdirəcəyinə işarə edir. Amma bu, ehtimal ki, kreditlər şəklində olacaq. Ukraynalılar pul borc alaraq Amerika silahlarını ala biləcək, amma vergi ödəyicilərinin hesabına yardım almayacaq".

O əlavə edib ki, Trampın yanaşmaları "güc vasitəsilə sülh" prinsipinə əsaslanır. "Bu, onun Putinin yalnız gücü başa düşdüyünü anladığını göstərir. Ona görə də Tramp güc nümayişini davam etdirməli və Ukraynanı möhkəm mövqeyə gətirməlidir ki, Putin müharibəni dayandırmağa məcbur olsun. Elə faktlar yaratmaq lazımdır ki, o, onlarla barışmalı və müharibəni davam etdirə bilməyəcəyini anlasın. Məhz bunu təmin etmək lazımdır", - diplomat deyib.

Bununla yanaşı, Volker qeyd edib ki, Tramp Rusiya ilə mübahisəni "şəxsi münaqişəyə çevirməmək" üçün çox ehtiyatlıdır. "O, Putinə öz rejimi qarşısında simasını tam itirmədən geri çəkilmək imkanı buraxmaq istəyir. Buna görə də düşünürəm ki, o, Putini demonizə etməməyə çalışır. Bununla belə, hesab edirəm ki, Tramp Ukraynanın güclü mövqe tutmasını təmin edəcək addımlar atacaq. Buraya həm Ukraynaya hərbi yardım, həm də Rusiyanın enerji sektoruna qarşı sanksiyalar daxildir", - o vurğulayıb.

Bundan əlavə, Trampın ABŞ-ın indiki prezidenti Cozef Baydenin Ukraynanın uzaqmənzilli zərbələrinə icazə vermək qərarını ləğv edib-etməyəcəyi ilə bağlı suala cavab olaraq diplomat bildirib ki, Tramp bu qərarı tənqid etsə də, onun ləğv edəcəyinə dair vəd verməyib. Onun fikrincə, Tramp bununla Putinin reaksiyasını gözləyir və buna əsaslanaraq qərar qəbul edəcək.

Eyni zamanda Dövlət Departamentinin keçmiş xüsusi nümayəndəsi qeyd edib ki, yanvar ayında general Kellog Ukraynaya səfər etməyi planlaşdırır. "Bu, faktları öyrənmək və hesabat hazırlamaq üçün səfər olacaq. Buna görə də düşünürəm ki, Trampın necə hərəkət edəcəyini anlamaq üçün bir az gözləməliyik", - Volker qeyd edib.