Hərbi Dəniz Qüvvələrinin şəhid Vətən Müharibəsi Qəhrəmanı

"Rusiya Ukraynaya qarşı müharibəni hələ bir neçə il davam etdirə bilər" - "The Washington Post"

"BRICS dolları "batıra" bilməz, bu, fantaziyadır" - "Bloomberg"

“Aygün Kazımova mənə gizlin və aşkarda o qədər jestlər edib ki...”-FOTOSESSİYA

“Gürcü xalqı ağlını başına yığmış xalqdır, ermənilər kimi ağlını itirmiş satqın xalq deyil...”

Xocalıya getmək istəyənlərin NƏZƏRİNƏ

"Ölümsüzlük bitkisi": Əzvay təbii sağlamlıq eliksiridir...

"Netanyahu hərbi cinayətkar və sionizmin övladıdır" -"Compact"

"Ukrayna Avropada Şimali Koreyaya qarşı vuruşmalı olacaq" - Zelenski

Hərbi Dəniz Qüvvələrinin şəhid Vətən Müharibəsi Qəhrəmanı

Ekskluziv

Oxunub: 3817

23 Oct 2024 | 16:16

Hərbi Dəniz Qüvvələrinin şəhid Vətən Müharibəsi Qəhrəmanı

İşğal altında olan torpaqlarımızın azad olunması uğrunda rəşadətlə döyüşərək şəhid olan qəhrəmanlarımızdan biri də kiçik miçman Fəqan Amil oğlu Zalovdur.

Fəqan Zalov 1 aprel 1997-ci ildə Sabirabad rayonunun Qalaqayın kəndində qaçqın düşərgəsində anadan olub. Fəqan əslən Füzuli rayonunun Aşağı Güzlək kəndindəndir. Fəqan Zalov 2003-2007-ci illərdə Füzuli rayon Babı kənd M.Hacıyev adına tam orta məktəbində təhsil alıb. 2010-2014-cü illərdə Sumqayıt şəhərində yerləşən Qubadlı rayon Alı Mustafayev adına Zilanlı kənd tam orta məktəbində təhsilini davam etdirib. Orta təhsilini başa vuran Fəqan Zalov 2015-ci ildə Füzuli Rayon Hərbi Komissarlığı tərəfindən həqiqi hərbi xidmətə çağırılıb. Fəqan Artilleriya Qoşunlarında müddətli həqiqi hərbi xidmət qulluqçusu olaraq xidmətini davam etdirib.

2016-cı ilin aprel döyüşlərində Fəqan Zalov Tərtər və Cəbrayıl-Füzuli istiqamətlərində şiddətli döyüşlərdə iştirak edib. Həmin döyüşlər zamanı Fəqan Zalov Azərbaycan Artilleriya Qoşunlarının əsgəri olaraq savaşıb. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunub. Aprel döyüşlərində yaralanan əsgər Fəqan Zalov müalicəsi bitdikdən sonra xidmətini davam etdirib. Fəqan Zalov 2017-ci ilin yanvar ayında müddətli həqiqi hərbi xidmətini başa vurub. Fəqan həqiqi hərbi xidmətini başa vurandan 9 ay sonra 2017-ci ilin oktyabrından dekabrınadək müddətdən artıq həqiqi hərbi xidmət hərbi qulluqçusu olmaq üçün kursa başlayıb. Kursu uğurla bitirdikdən sonra Fəqan Zalov Azərbaycan Hərbi Dəniz Qüvvələrinin müddətdən artıq həqiqi hərbi xidmət qulluqçusu kimi xidmətə başlayıb. Fəqan 2017-ci ilin dekabr ayından 2019-cu ilin mart ayına qədər Hərbi Dəniz Qüvvələrinin “N” saylı hərbi hissəsinin Gözətçi Gəmilər Diviziyasının “N” nömrəli gəmisində komendor vəzifəsində xidmət edib. Gəmidə xidmət etdiyi dövrdə Xəzəryanı dövlətlərinin birgə təşəbbüsü ilə keçirilən “Beynəlxalq dəniz kuboku” yarışlarında iştirak edib. Fəqanın xidmət etdiyi gəmi dəniz kuboku yarışlarında dəfələrlə qalib gəlib. Yarışlarda gəminin komendoru Fəqan Zalov bir çox fəxri fərmanlarla təltif olunub. 2018-ci ilin mart ayından 2018-ci ilin dekabr ayınadək “N” saylı hərbi hissənin nəzdində olan Xüsusi Təyinatlı Kəşfiyyat kursunu birincilik dərəcəsi ilə bitirdiyinə görə “kiçik miçman” rütbəsi alıb. 2019-cu ilin mart ayından “N” saylı hərbi hissədə Sualtı Hücum Xüsusi Təyinatlı Qüvvələrində xidmət edib. Fəqan Zalov xidmət etdiyi dövrdə kəşfiyyatçı olaraq “Dağçılıq”, “Paraşüt”, “Antiterror”, “Amfibiya” kurslarını bitirib.

2020-ci il sentyabrın 27-də Ermənistanın növbəti hərbi təxribatının qarşısını almaq üçün əks hücum əməliyyatı başlayanda Fəqan Zalov da ön cəbhəyə yollanıb. Azərbaycan Ordusunun Sualtı Hücum Xüsusi Təyinatlı Qüvvələrinin kiçik miçmanı olan Fəqan Zalov Vətən Müharibəsi zamanı əvvəlcə Cəbrayılın azad edilməsi uğrunda gedən döyüşlərə qatılıb. Fəqan Cəbrayıl rayonundan başlayan əks hücum əməliyyatlarında qarşı tərəfin illər boyu qurduğu və möhkəmləndirdiyi mühəndis-istehkam və müdafiə zolaqlarının yarılmasında bir çox istiqamətdəki strateji yüksəkliklərin ələ keçirilməsində fərqlənib. Xüsusi Təyinatlı Qüvvələr tərəfindən dörd gün ərzində Cəbrayıl şəhəri istiqamətində olan əlverişli mövqelər, strateji nöqtələr, o cümlədən Cəbrayıl şəhəri və rayonun 14 yaşayış məntəqəsi — Aşağı Maralyan, Çaxırlı, Mehdili, Quycaq, Şəybəy, Cəfərabad, Çərən, Daşəsən, Dəjəl, Horovlu, Karxulu, Mahmudlu, Şürbəyli və Yuxarı Maralyan işğaldan azad edilib.

Fəqan Zalov 11 oktyabr 2020-ci ildə Cəbrayıl rayonunun Soltanlı kəndi istiqamətində ayağından qəlpə yarası alaraq yaralanıb. Əvvəlcə, Füzuli rayonunda, sonra Beyləqan rayonunda, sonuncu dəfə isə Hacıqabul rayonunda yerləşən xəstəxanaya yerləşdirilib. Yarası sağalandan sonra verilən məzuniyyətdən imtina edən Fəqan yenidən döyüş meydanına qayıdıb. Oktyabrın 19-da Sualtı Hücum Xüsusi Təyinatlı Qüvvələrinin də iştirak etdiyi hərbi əməliyyatlar nəticəsində Azərbaycan Silahlı Qüvvələri tərəfindən Cəbrayıl rayonunun Soltanlı, Əmirvarlı, Maşanlı, Hasanlı, Alıkeyxalı, Qumlaq, Hacılı, Göyərçin Veysəlli, Niyazqulular, Keçəl Məmmədli, Şahvəlli, Hacı İsmayıllı, İsaqlı kəndləri işğaldan azad edilib. Fəqan Zalov bundan sonra Qubadlının azad edilməsi uğrunda gedən döyüşlərdə də vuruşaraq fərqlənib.

Fəqan Zalovun son döyüşü Xocavənd istiqamətində olub. Fəqan Zalov noyabrın 9-da Xocavənd rayonunun yüksəkliklərinin azad edilməsi əməliyyatını yerinə yetirən zaman qarşı tərəfin atdığı mərmilərin partlayışı nəticəsində qəlpə yarası alaraq şəhid olub. Fəqan Zalov Füzuli rayonunun Babı kəndində yerləşən qəbiristanlıqda dəfn olunub.

Azərbaycanın ərazi bütövlüyünün bərpa edilməsində xüsusi xidmətlərinə və işğal olunan ərazilərin azad olunması zamanı düşmənin məhv edilməsi üzrə qarşıya qoyulan döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09 dekabr 2020-ci il tarixli Sərəncamına əsasən kiçik miçman Fəqan Zalova “Vətən Müharibəsi Qəhrəmanı” adı verilib.

Bundan başqa Fəqan Zalov Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən ölümündən sonra “Vətən uğrunda”, “Cəbrayılın azad olunmasına görə”, “Xocavəndin azad olunmasına görə”, “Füzulinin azad olunmasına görə” və “Qubadlının azad olunmasına görə” medalları ilə təltif edilib.

Vətən Müharibəsi Qəhrəmanı Fəqan Zalovun adının əbədiləşdirilməsi üçün də tədbirlər görülüb. 2021-ci ildən Füzuli rayonu Horadiz şəhəri 3 nömrəli tam orta məktəb Vətən Müharibəsi Qəhrəmanı Fəqan Zalovun adını daşıyır.

Bu yazı Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Təhsilə Dəstək Mərkəzi” İctimai Birliyinin icra etdiyi “Şərqi Zəngəzur məktəblərində Vətən Müharibəsi Qəhrəmanlarının təbliği” layihəsi çərçivəsində hazırlanıb. Yazının məzmununda əks olunan fikir və mülahizələr müəllifə aiddir və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin rəsmi mövqeyini əks etdirməyə bilər.