“Əslində Vladimir Solovyovun Rusiya ali baş komandanının istefası haqda dediyi bir anonim, qeyri-müyyən istiqamətə yönəlmiş bir atmaca idi. Sadəcə Rusiyanın müxalif və Ukraynanın təbliğatçı mediası bunu çox qabartdı. Əslində ola bilər ki, bu elə Putinə də ünvanlanmış bir çağırış olsun. Əgər belədirsə, şübhəsiz ki, bunun arxasında kimsə dayanır. Çünki bu, Solovyovun öz təşəbbüsü ola bilməz. Bunun arxasında kimin dayandığını isə, əlbəttə, söyləmək çox çətindir. Ona görə ki, Rusiyada Müdafiə Nazirliyində aparılan həbslərdən, Priqojinin, müxalifətçi Navalnının qətlindən sonra, şübhəsiz ki, böyük əskəriyyəti hakimiyyətin daxilində olan gizli və yarımgizli qüvvələr artıq tam gizli fəaliyyətə keçiblər, özlərini göstərməməyə çalışırlar.  O səbəbdən ki, Rusiyada yaranmış vəziyyət fonunda hakimiyyət uğrunda mübarizə, o cümlədən də hakimiyyəti qorumaq uğrunda mübarizə faktiki ölüm-dirim məsələsinə çevrilib”.  

 

Bu fikirləri Moderator.az-a açıqlamasında siyasi təhlükəsizlik məsələləri üzrə ekspert Ərəstun Oruclu "Sizcə, necə oldu, Putinin baş tele-ruporlarından biri olan Solovyov ad çəkmədən dedi ki, lazımdısa, ali baş komandanın da, yəni Putinin də istefasını təşkil edək? O, bunu Rusiyanın elitasındakı hansısa klanın göstərişi ilə etdi, yoxsa?"  sualını cavablandırarkən ifadə edib.

 

“Amma nəzərə alaq ki, Rusiya miqyasca böyük bir ölkədir və orada bir şəxsin, hətta bir neçə şəxsin bütün dövlətə, hətta onun institutlarına, onun daxilindəki müxtəlif maraq qruplarına nəzarət etmək imkanı yoxdur. Bu, qeyri-mümkündür. Nə dərəcədə güclü “FTX”-sı, başqa xəfiyyə xidmətləri olursa-olsun, bu, mümkünsüz bir işdir. Bunu Putin Stalin təcrübəsi ilə də bilməlidir. Çünki hətta Stalinin də o cür ciddi, o cür qəddar nəzarəti şəraitində də ona müxalif olanlar olub və zaman-zaman baş qaldırıblar da... Yəni Solovyovun bəhs edilən  addımı Rusiyada hansısa bir daxili gərginliyin, daxili qarşıdurmanın anonsu ola bilər. Və yaxud da bu elə Putinin özü, onun tərəfdarları tərəfindən daxili repressiyalar üçün verilmiş bir anons ola bilər”, -deyə davamında analitik nəzərə çatdırıb. 

 

Ərəstun Oruclu hesab edir ki, artıq bundan sonra Putin rejiminin cinayətlərinə şərik olaraq batmaq istəməyən qüvvələr fəallaşmaqdadır.

 

“Hər bir halda bütün diktatura rejimlərində olduğu kimi, Rusiyada da elə bir vəziyyət yetişibdir ki,  həmin durumu siyasi paranoya kimi qiymətləndirmək olar. Yəni hamı bir-birindən xoflanır, hamı bir-birindən şübhələnir. Heç  kəs yuxarı rəhbərliyin həyata keçirdiyi cinayətlərə bundan sonra şərik olmaq istəmir, uğursuzluğu bölüşmək istəmir. Əlbəttə,  belə bir şəraitdə hər iki tərəfdən qarşılıqlı addımlar da atıla bilər. Yəni “hər iki tərəf” dedikdə, Putini, onu dəstəkləyənləri və bundan sonra onların cinayətlərinə şərik olaraq batmaq istəməyən müəyyən qrupları nəzərdə tuturam.  Şübhəsiz ki, Rusiyada belə qruplar da var. Olmamış olmaz... Öncə dediyim kimi, Rusiya böyük dövlətdir  və orada ən müxtəlif maraq qruplarının olması tamamilə təbiidir”, -deyə  ekspert vurğulayıb.

 

Sultan Laçın