"Kursk əməliyyatı risklidir, amma ukraynalılar çox bacarıqlıdır" - Stoltenberq

Bizi sosial şəbəkələrdən izləyin:

"Biz USQ-yə komandanlıq etmirik, müharibə aparmırıq, bütün qərarları ukraynalılar özləri qəbul etməlidir..."

NATO Ukraynaya məsləhətlər verə bilər, lakin Ukrayna Silahlı Qüvvələrinə komandanlıq etmir və bütün qərarları Ukrayna özü müstəqil şəkildə qəbul edir.

Moderator.az xəbər verir ki, bu barədə NATO-nun baş katibi Yens Stoltenberq "Foreign Policy" nəşrinə müsahibəsində bəyan edib.

"NATO üzrə müttəfiqlər və NATO Ukraynaya misli görünməyən dəstək göstərir. Hərbi yardımın 99 faizi NATO üzrə müttəfiqlər və NATO tərəfindən daxil olur. Biz onlara məsləhətlər veririk. Lakin biz müharibə aparmırıq. Biz Ukrayna Silahlı Qüvvələrinə komandanlıq etmirik. Bu çətin qərarları ukraynalılar özləri qəbul etməlidir", - Stoltenberq deyib.

O, həmçinin qeyd edib ki, Kursk əməliyyatı Ukrayna qoşunlarının çevikliyi və hücum imkanlarını nümayiş etdirib, Rusiya qoşunlarını ağır itkilərə məruz qoyub və ukraynalıların mənəvi ruhunu yüksəldib.

"Əlbəttə, müharibədə həmişə risk və qeyri-müəyyənlik olur. Ona görə də mən yaxın həftələr və aylarda bütün bunların necə inkişaf edəcəyi ilə bağlı çox ehtiyatlı olacağam. Lakin biz unutmamalıyıq ki, ukraynalılar çox bacarıqlıdır", - NATO-nun baş katibi vurğulayıb.

O, xatırladıb ki, müharibənin əvvəlində belə fikir olub ki, Rusiya bir neçə gün ərzində Kiyevi, bir neçə həftə ərzində isə Ukraynanı nəzarətə götürəcək, amma Ukrayna nəinki tab gətirib, həm də özü Rusiya ərazisinə soxulub.

"Ona görə də düşünürəm ki, biz ukraynalılara və onların mürəkkəb döyüş meydanında və hərbi əməliyyatlar teatrında böyük qeyri-müəyyənlik şəraitində etibar etməkdə davam etməliyik", - Stoltenberq deyib.