"Bu bərə işğalçıları yanacaq-sürtkü materialları və silahla təchiz edib..."

 

Ukraynada müharibə davam edir və Ukrayna Hərbi-Dəniz Donaması Rusiyanın Krasnodar diyarının "Qafqaz" limanında "Konro Treyder" bərəsinin məhv edilməsini rəsmən təsdiq edib.

 

Moderator.az xəbər verir ki, bu barədə USQ Hərbi-Dəniz Donanmasının spikeri, 3-cü dərəcəli kapitan Dmitri Pletençuk "Azadlıq Radiosu"na müsahibəsində bəyan edib.

 

"Biz hədəfin Hərbi-Dəniz qüvvələri tərəfindən məhv edildiyini təsdiq edirik. Bu bərə Rusiyanın işğalçı qüvvələrinin təchizatı üçün hərbi logistikasının mühüm zəncirlərindən biridir. Ona görə də tamamilə qanuni hədəfdir", - o, deyib.

 

Onun sözlərinə görə, bu, işğalçıların fəal döyüş əməliyyatları apardığı yerlərdə potensial imkanlarını azaltmalıdır. Bərəyə hansı silahdan zərbə endirilməsi dəqiqləşdirilmir.

 

Əlavə edək ki, zərbə anında bərədə yanacaqla dolu 30 sistern olub. Yanğının söndürülməsi üçün yanğınsöndürən qatar cəlb edilib.

 

Bərəyə zərbə, ehtimal ki, "Neptun" raketi ilə endirilib. "Konro-Treyder" işğal edilmiş Kerç şəhəri ilə Rusiya arasında fəaliyyət göstərən yeganə böyük bərədir.