Macarıstan baş naziri Viktor Orbanın Avropa İttifaqı üzrə tərəfdaşları ilə təkəbbürü ölkəsinin təcridinə və zəiflədilməsinə səbəb olub, bu da getdikcə artan diplomatik qırılmanın son əlamətidir.

 

Moderator.az xəbər verir ki, bu barədə Polşa xarici işlər naziri Radoslav Sikorski "Visegrad İnsight" internet-nəşrinə müsahibəsində bəyan edib. Məlumatı "Bloomberg" nəşri yayıb.

 

Onun sözlərinə görə, Macarıstanın ötən həftə Rusiya neftinin tədarükünün dayandırılması ilə bağlı Ukrayna ilə məsələnin həllinin tapılması barəsində Avropa İttifaqına müraciət edəndə öz mövqeyi olmayıb. Bəllidir ki, Kiyev faktiki olaraq neftin "Lukoyl" ASC-dən tranzitini qadağan edib, bu səbəbdən Macarıstan artıq sentyabrda yanacaq qıtlığı ilə üzləşə bilər.

 

"Onlar Avropadan neftin tədarükü ilə bağlı məsələdə həmrəy olmağı xahiş edəndə təcrid olunmuş görkəmdədir. Onlar belə həmrəyliyi əldə edə bilmir, çünki kimsə təkəbbürlü davranırsa, çətinliklə özünə dostlar qazanır", - Sikorski izah edib.

 

Nəşr xatırladıb ki, Orbanın Rusiya diktatoru ilə sıx əlaqələri var, onun Moskvaya üzdəniraq "sülh missiyası" isə Ukraynada antaqonizm yaradıb. Orbanın Avropa İttifaqında altı aylıq sədrliyi zamanı diplomatik səyləri digər üzv-ölkələrdə qəzəb doğurub. Onlar qeyd edib ki, Macarıstan lideri Avropa İttifaqı adından danışıqlar aparmaq mandatına malik deyil. 

 

"Mən Moskva ilə Brüssel arasında yerləşən macar simmetriyasının Macarıstanın təsir rıçaqlarını gücləndirməsini görmürəm. Bunun əvəzinə o, hamını qıcıqlandırır və boğaza yığır", - Polşa XİN rəhbəri şərh edib.

 

Bundan başqa, Orban Rumıniyanın Beil-Tuşnad şəhərində illik görüş zamanı çıxışında Çinin dəstəyilə yeni dünya düzəni və Donald Trampın Ağ Evə potensial dönüşü barədə öz baxışlarını təqdim edib. O, həmçinin Polşanı vasitəçilərin köməyilə Rusiyada biznes aparmaqda ittiham edib.

 

Eyni zamanda Polşa XİN rəhbərinin müavini Vladislav Teofil Bartoşevski bu bəyanatı təkzib edib və Macarıstana Avropa İttifaqından çıxmağı təklif edib.

 

 

Bundan öncə Orban bəyan edib ki, Rusiya rəhbərliyi "hiperrasionaldır". O, həmçinin qeyd edib ki, Ukrayna heç vaxt Avropa İttifaqı və NATO-ya daxil olmayacaq.

 

Onun sözlərinə görə, Qərbin "zəifliyindən" fərqli olaraq Rusiya dünya məsələlərində rasional və proqnozlaşdırılandır. Orban əlavə edib ki, onun ölkəsi 2014-cü ildə Krıma hərbi müdaxilədən sonra Qərbin sanksiyalarına uyğunlaşaraq iqtisadi çeviklik göstərib.

 

Bu günlər isə baş nazir "Şimal axını" qaz kəmərinin partladılmasında ABŞ-ı ittiham edib. Onun sözlərinə görə, Avropanın siyasəti iflasa uğrayıb və qitə öz maraqlarını daha qoruya bilmir.