Parisdə Olimpiya Oyunlarında təxribatlar hazırlamaqda şübhəli bilinərək həbs edilən 40 yaşlı rusiyalının "The Insider", "Der Spiegel" və "Le Monde" jurnallarının birgə araşdırmasına görə, aşpaz Kirill Qryaznov olduğu üzə çıxıb. 

 

Moderator.az-ın “Meduza”ya istinadla yaydığı xəbərdə deyilir ki, jurnalistlər daha əvvəl Rusiyanın "NTV" və "Domaşniy" telekanallarının şoularında iştirak edən Qryaznovun "FSB" və "QRU" zabitləri ilə bağlı olduğunu müəyyən ediblər.  

Araşdırmaya görə, Qryaznov Parisə səfərinin məqsədini içkili şəkildə etdiyi söhbətində açıqlayıb. İndi onu casusluq ittihamı ilə 30 ilə qədər həbs gözləyir. “Meduza” araşdırmanın əsas məqamlarını təqdim edib.

 

Təhqiqatçılar bildirir ki, Kirill Qryaznov 2024-cü ilin mayında xüsusi xidmət orqanlarının diqqətini  cəlb edib - onu alkoqol ələ verib. Mayın 7-də o, İstanbulda transferlə Moskvadan Parisə uçmağı planlaşdırıb. Ancaq Türkiyədə rus o qədər sərxoş olub ki, onu təyyarəyə buraxmayıblar və qara siyahıya salıblar. Aşpaz maşınla Bolqarıstana çata bilib və orada yenə restoranlardan birində içki içib və təsadüfi insanlara Rusiya xüsusi xidmət orqanlarının gizli tapşırığı ilə Parisə getdiyini deməyə başlayıb.

 

Şahidlərin sözlərinə görə, Qryaznov konkret nə demək istədiyini açıqlamadan Fransada "bu Olimpiadanı uzun müddət xatırlayacaqları" ilə hədələyib. İddialara görə, o, xüsusi xidmət orqanlarında işlədiyini sübut etmək üçün həmsöhbətlərinə hansısa iş vəsiqəsini göstərib, həm də kiməsə zəng edərək bu iş üçün Kişinyovdan bir nəfəri ələ aldığını bildirib

 

Fransa hüquq-mühafizə orqanlarının əməkdaşları Qryaznovu iyulun 21-də Parisin mərkəzindəki Rue Saint-Denis küçəsindəki mənzilində həbs ediblər. O, “Fransada hərbi əməliyyatları qızışdırmaq” məqsədi ilə xarici dövlətin maraqları naminə “kəşfiyyat fəaliyyəti” ilə ittiham olunub. Qryaznovu 30 ilə qədər həbs gözləyir. Hazırda o, istintaq təcridxanasındadır.

 

Qryaznovun Parisdəki Olimpiada zamanı hansı təxribatlar təşkil edəcəyi barədə ictimaiyyətə məlumat verilməyib. "Le Parisien"in mənbələri bunun nəticələrinin "ciddi" ola biləcəyi "nəhəng layihə" olduğunu söylədi.

 

Paris prokurorluğunun məlumatına görə, həbs zamanı rusiyalının üzərindən bəzi “diplomatik materiallar” və Rusiya xüsusi xidmət orqanlarının “V" bölməsinə” üzv olduğunu göstərən şəxsiyyət vəsiqəsi tapılıb. "İnsider" hesab edir ki, söhbət "FSB"-nin "Vımpel" adlı  xüsusi təyinatlılarının sertifikatından gedir. “Lakin Qryaznov mövcud keçmişi ilə orada xidmət edə bilməzdi və təsəvvür etmək mümkün deyil ki, “Vımpel” işçiləri rəsmi vəsiqələrini özləri ilə aparacaqlar”, - nəşr belə yazır.

 

S.Laçın