“Əvvəla, İlham Əliyevlə Paşinyanın Londonda baş tutmalı olan görüşü barədə müəmmalı məsələlər var. Azərbaycan tərəfindən görüş təklifi olub və erməni tərəfin bunu qəbul etmədiyini Azərbaycan Prezidentinin  köməkçisi Hikmət Hacıyev də təsdiqləyir. Və sonradan Ermənistan Xarici İşlər Nazirliyinin mətbuat katibi erməni tərəfindən görüşdən imtina olunmasını təkzib edir. Ona görə də burada müəmmalı ziddiyyətlər mövcuddur”. 

 

Bu fikirləri Moderator.az-a açıqlamasında Lond Avropa Siyasi Birliyinin Londonda keçirilən görüşü çərçivəsində Azərbaycan və Ermənistan liderlərinin görüşünün baş tutmamasının səbəblərindən danışarkən beynəlxalq münasibətlər üzrə analitik Teymur Qasımlı ifadə edib. 

 

“Hesab edirəm ki,  Paşinyanın Azərbaycan dövlət başçısıyla görüşdən imtina etməsinin  bir neçə səbəbi ola bilər. Birincisi, erməni baş nazirin məqsədi Londonda İlham Əliyevlə  görüş keçirməklə Moskvanın növbəti dəfə qıcıqlandırmamaq ola bilər. Bildiyiniz kimi, son vaxtlar xüsusən Kremlin Ukraynaya açıq təacüvüzü  fonunda Rusiya-Britaniya münasibətləri çox gərgindir və tarix boyu da gərgin olub. 

 

İkincisi, burada Fransa amilinin də rolunu görürəm. Çünki son illər Fransa Paşinyan hakimiyyətinin  təhlükəsizliyi üçün çox böyük işlər görür, orduda, polisdə, təhlükəsizlik xidmətində islahatlara dəstək verir. 

 

Üçüncüsü, diplomatik mənbələrdən aldığımız məlumata görə, hələlik rəsmən bildirilməsə də, Azərbaycan tərəfi  Ermənistan qarşısında Konstitusiyanın dəyişdirilməsi ilə yanaşı, artıq 1988-ci ildən bəri torpaqlarımızın işğalı zamanı xalqımıza və dövlətimizə vurulmuş zərərlərə görə təzminat ödənilməsi məsələsini də qaldırıb. Yeri gəlmişkən, bunu da Azərbaycan cəmiyyəti olaraq dəstəkləməliyik. Odur ki, rəsmi İrəvan bu və digər tələblərin ödənilməsindən bir müddət yayınmaq üçün liderlər səviyyəsində görüşdən yayınır. Lakin hesab edirik ki, Azərbaycan Ermənistanla qeyri-rəsmi və vasitəçisiz diplomatik danışıqları da davam etdirir. Bu da düzgün və təqdirolunandır”,- deyə analitik diqqətə çatdırıb.

 

Sultan Laçın