44 günlük savaşdan bəri keçən illər ərzində Azərbaycan dövlətinin Fransa dövləti ilə münasibətləri günü-gündən pisləşməkdə, az qala, düşmənçilik səviyyəsinə satmaqdadır. Xüsusən də son vaxtlar Ermənistanın Fransadan silah və texnika almağa başlaması, bu ölkə ilə hərbi sazişlər imzalaması ölkəmizin əksər telekanal, sayt və qəzetlərinin Fransanı rəqib bir ölkə kimi hədəfə almasına səbəb olub. Hətta rəsmi səviyyələrdə də Parisə qarşı ittihamlar səslənməkdədir. Ancaq maraqlı bir nüans ortalığa çıxır. Son illər Hindistan Ermənistana  Fransadan daha çox silah və texnuka satıb. Artıq bu ölkədən qonşu ölkəyə “Akaş-SAM” (“Akash-SAM”) (yer-hava) zenit-raket kompleksləri, haubitsalar və s. də gəlib. Hətta bir şox silah və texnikaların Dehlidən İrəvana  Rusiyaya məxsus hərbi təyyarələrlə daşınması faktlarına da rast gəlinir... Lakin Fransa Ermənistana raketlər satmağa hələ hazırlaşır. Bəs o halda Hindistan niyə Azərbaycan rəsmilərinin və mediasının hədəfinə çevrilmir?

 

Mövzu ilə bağlı Moderator.az-a açıqlamasında keçmiş xarici işlər naziri Tofiq Zülfüqarov bunları söyləyib:

 

“Bilirsiz, burada həm iqtisadi, həm siyasi matraqlar var.  Hindistan silah ixracına yenicə başlamış ölkələrdəndir. Və bu ölkənin siıahlarının əksəriyyəti həmin sahədə  aparıcı digər dövlətlərin lisenziyaları əsasında istehsal olunur. Və burada Fransanın da payı xeylidir. Həmçinin Ermənistana satılan Hindistan silahlarının da əksəriyyəti Fransa lisenziyalıdır. Onların qiyməti daha aşağıdır. Və Hindistana həmin silahları hansı ölkələrə satmaq icazəsini də rəsmi Paris verir. Yəni silah istehsalına lisenziya verəndə belə şərtlər həmişə olur. Ona görə də biz görürük ki, burada Hindistanın əsasən iqtisadi baxımdan marağı var. Silahlarını sataraq digər alıcı ölkələr üçün də reklam etdirir. Digər tərəfdən biz bilirik ki, Hindistanın Pakistanla münaqişəsi gah sakitləşir, gah yenidən alovlanır. Həmçinin Çinlə də... Odur ki, bu ölkənin digər ölkələrə silah, texnika satışını Çinə və Pakistana qarşı bir addım kimi də qəbul etmək olar...

 

Bir sual da odur ki, Hindistandan Ermənistana gələn silahları İran nə üçün öz ərazisindən buraxır. Birincisi, İranın Çinlə də çox geniş əlaqələri var. Və burada Çinin də İrana təsir göstərəcəyi istisna deyil. Yəni Ermənistan elə də asanlıqla öz istəklərinə nail ola bilmir. İkincisi, biz anlamalıyıq ki, burada silahdan çox  “güclü silah” mifi yaratmaq kimi niyyətlər də var.  44 günlük müharibədən əvvəlki vəziyyəti yada salsaq, görərik ki, Ermənistan eyni oyunu Rusiya ilə də aparırdı. Moskva onlara “İsgəndər” raketləri verirdi, Paşinyan rusların verdiyi qırıcılarda selfi edirdi və s. Sonradan isə məlum oldu ki, həmin silah və texnikaların verilməsi çox böyük sual altındadır. Yadınızdadırsa, Şuşa azad ediləndən sonra “İsgəndər” raketləri ilə bağlı qalmaqallar ortaya çıxdı. Ermənilər onları harasa atıblar, gah partlayıb, gah partlamayıb.  Sonra belə mövzular əsasında Ermənistan generalları qiyam qaldırmağa da cəhd etdilər. Çünki silah və texnikalarla bağlı bu cür yalanların tirajlanması müharibədə uğur qazanılacağı haqda həm guya Azərbaycanı qorxutmaq məqsədi güdən, həm də daxili auditoriyaya hesablanmış bir şou elementi idi. Belə elementləri bir növ Hindistandan və Fransadan silah, texnika alınmasına da şamil etmək olar. Ancaq, sözsüz ki, bunlar da faydasız cəhdlərdir.  Çünki hamı yaxşı başa düşür ki, Ermənistan coğrafi baxımdan bir tərəfdən Türkiyə ilə, digər tərəfdən isə Azərbaycanla qonşudur. Bu mənada hazırkı Ermənistanın silahlanmasının hərbi baxımdan heç bir perspesktivi yoxdur. Yəni istənilən qədər silah, texnika toplasalar da, Ermənistan onsuz da ikinci İsrail ola bilməz. Digər tərəfdən, ermənilərin heş canlı qüvvə potensialı da yoxdur; İsrail əhalisinin sayı artıq 10 milyona yaxınlaşır. Ermənistanın isə rəsmi rəqəmlərə görə, cəmi 3 milyona yaxın əhalisi var. Amma faktiki ölkədə olan insan sayı bundan da azdır və gündən-günə daha da azalır. Özləri etiraf edirlər ki, hazırda Ermənistanda uzaqbaşı, 1,5 milyon adam var. Avropa İttifaqıyla viza məsələsi aradan götürülsə, azı yarım milyon erməni də oraya qaçacaq. Bir sözlə, Fransa və Hindistandan silah alınması məsələsində də reallıqdan çox, təbliğatdan söhbət gedir...” 

 

Sultan Laçın