Moderator.az xəbər verir ki, bu barədə Amerikanın "Bloomberg" nəşri yazıb.

 

Məqalədə deyilir ki, bu fraksiyaya Orbanın "Fides"' partiyası, Herbert Kiklin Avstriya Azadlıq Partiyası və Çexiyanın sabiq baş naziri Andrey Babişin "ANO 2011" siyasi hərəkatı daxil ediləcək.

 

"Biz irəliyə gedəcək və tezliklə Avropada ən böyük sağ qrup olacaq siyasi formasiya yaradırıq", - bunu Orban bu gün, Macarıstanın altı ay müddətində Avropa İttifaqında sədrliyi qəbul edəcəyindən bir gün öncə Vyanada prezentasiya zamanı bəyan edib.

 

"Avropalıların istədiyi üç nəsnə sülh, qayda-qanun və inkişafdır. Onların bu gün Brüsseldən əldə etdikləri isə müharibə, miqrasiya və staqnasiyadır", - Orban əlavə edib.

 

Öz qüvvələrini birləşdirən üç partiya əvvəlcə Avropa Parlamentində ayrıca fraksiyanın rəsmən yaradılması üçün ən azı 23 yerə malik olacaq. 

 

Lakin onların tanınması üçün həmçinin Avropa İttifaqının üzvü olan ən azı yeddi dövlətin deputatlarını da daxil etmək lazımdır.  

 

Fraksiyanın proqramında Avropa İttifaqının təsirinin məhdudlaşdırılması, İttifaqın üzv dövlətlərinin səlahiyyətlərinin genişləndirilməsi və qeyri-leqal miqrasiya ilə mübarizə nəzərdə tutulur.

 

"Euronews" nəşrinin qeyd etdiyi kimi, bütün üç partiya rusiyayönümlüdür. Onlardan heç biri 2022-ci ildə başlanan Rusiya təcavüzü ilə mübarizədə Ukraynaya dəstək verməyib.

 

"Orban son illər, görünür, müntəzəm olaraq Ukraynada müharibə, Rusiya və Çinlə münasibət kimi məsələlər üzrə çoxluğa qarşı çıxaraq Avropa İttifaqının həlledici qərarlarını bloklamaqdan, yumşaltmaqdan və ya təxirə salmaqdan həzz alıb.

 

Onun Avropa İttifaqı siyasətinə və mövqeyinə qarşı açıq şəkildə müxalif mövqeyi uzun zaman blokun digər hökumətlərini qıcıqlandırıb və onu qitənin kənarına sürükləyib", - "Euronews" qeyd edib.

 

Macarıstanın müxalif TIZSA ("Hörmət və azadlıq") partiyasının vitse-prezidenti Peter Madyar Orbanın təşəbbüsünü qətiyyətlə tənqid edib.

 

"Liberal İnternasionalın,  sonra isə Avropa Xalq Partiyasının sabiq vitse-prezidenti Viktor Orban bu gün "böyük" bəyanatla çıxış edib.

 

O, bəyan edib ki, özündən başqa bütün avropalı siyasətçilər Avropaya qarşı işləyir və o, yeni partiya alyansı yaradacaq.

 

"Vətənpərvərləri birləşdirən nədir? Güman edilir ki, bu, qeyri-leqal miqrasiyanın qarşısının alınmasıdır. Viktor Orban öz yeni müttəfiqlərinə 2 min nəfərin insan alverçilərindən azad edilməsi, köçürülmə üçün istiqrazlar və on minlərlə iqtisadi miqrantların gətirilməsindən danışıbmı?" - müxalifətçi "Facebook" səhifəsində yazıb.

 

"Əgər sizi heç bir kluba dəvət etmirlərsə, siz bunun acığına öz klubunuzu yaradıb dərhal onun həqiqi, ən böyük və yeganə olduğunu bəyan edirsiniz", - Madyar sarkazm dolu şərh yazıb və gülüş "smayliklərini" əlavə edib.