“Türkiyənin “BRİKS”-ə üz tutması həm də onun düzgün yolda olduğundan xəbər verir. “BRİKS”-in “AB-yə alternativ” olması fikrinə gəldikdə isə əvvəllər bu bir həqiqət idi. O vaxta qədər ki, AB  ABŞ-a qarşı rəqabət aparan bir quruma çevrilmişdi. İndi isə Ukraynada gedən müharibə bu ölkələr birliyinin güclü iqtisadiyyatını dağıtmaqda və ABŞ-dan tam asılı vəziyyətə salmaqdadır. Dərinə getsək. Rusiya və ABŞ-ın AB-nin dağıdılmasında böyük rolu vardır. Vaxt vardı, Türkiyə də bu birliyə girmək arzusunda idi. Ancaq indi AB yalvarsa da Türkiyə bu quruma  daxil olmayacaq, çünki  müasir Türkiyənin əsas siyasi xətti iqtisadi maraqlardan çıxış etməkdir. “BRİKS” isə Türkiyə üçün yeni iqtisadi  imkanlar yaradır” 

 

Bu fikirləri Moderator.az-a açıqlamasında “Bu günlərdə Türkiyə XİN başçısı Hakan Fidanın Çində də, Rusiyada da ölkəsinin “BRİKS”-ə daxil olma arzusunu ifadə etməsi, həmin qurumun Rusiyadakı tədbirində iştirak etməsi, hətta “BRİKS”i “AB-yə alternativ” adlandırması Ərdoğan iqtidarının doğrudanmı Moskvanın aparıcı rol oynadığı quruma üzvlükdə maraqlı olmasını ifadə edir, yoxsa bu, rəsmi Ankaranın növbəti özünəməxsus gedişidir?”sualını cavablandıran siyasi analitik Tahir Cəfərli ifadə edib.

 

“Düşünsək ki,  Türkiyə öz  xarici siyasətini iqtisadi maraqlar üzərində qurur, onun bu quruma üzv olacağı fikri ilə razılaşmalıyıq. Türkiyədəki son illər baş alıb gedən inflyasiya və bahalaşmalar da onu bu quruma yaxınlaşdırır və bir çox problemlərinin həllinə gəldikdə, ona yardımçı ola bilər. Nəzərə alsaq ki, Rusiya  Türkiyədə  Atom Elektrik Stansiyası tikir və bu ölkəni atom enerjili ölkəyə çevirir, nə ağılla Türkiyə rəhbərliyi bu qurumdan qaçmalıdır?  Avropanın dağıldığı bir vaxtda bahalaşmağa baxmayaraq Türkiyə  ciddi elmi-texniki inkişaf həddinə çatmışdır”, -deyə davamında Tahir Cəfərli bildirib.

 

“Keçək “BRİKS” ölkələrinə və onların iqtisadi imkanlarına. Bu birlik ABŞ-ın mono-qütblüyünə son qoyur və ona qarşı güclü resurslar və iqtisadiyyat durur. Ciddi addımları nəticəsində ABŞ tərəfindən idarə olunan Ümumdunya Ticarət Təşkilatının fəaliyyətini məhdudlaşdırır...

 

Maraqlısı budur ki, Türkiyədəki bahalaşmanı Avropanın Ukrayna müharibəsinə qoşulması ilə bağlayırlar, digər tərəfdən, ölkə inkişafının tempini artırmaq üçün “BRİKS”-ə qoşulmanın vacibliyini də qeyd edirlər. Nəzərinizə çatdırmaq istərdik ki, Türkiyə hətta Avrasiya ittifaqına da üzv olmaq istədiyini də bəyan etmişdi. Bütün bunlar onu göstərir ki, dünya çoxqütblüyə hazırdır və belə təşkilatlar təkqütblüyə son qoyur”, - deyə şərhçi diqqətə çatdırıb.

 

“ "BRİKS"-ə daxil olmaq Türkiyəyə hansısa iqtisadi, yaxud siyasi fayda verə bilərmi?” sualına isə analitik belə cavab verib:

 

“ “BRİKS” gün-gündən yüksək imkanları  və resursları olan birliyə çevrilir. AB -nin isə “BRİKS”lə müqayisədə o qədər  güclü resursları yoxdur. Türkiyənin bu təşkilata qoşulmağı onun üçün istər iqtisadi, istərsə siyasi baxımdan müsbət imkanlar yaradır. Hər şeydən əvvəl bu ölkəni regionun aparıcı dövlətinə çevirir. Fikir verin, son hadisələrə: Türkiyə “BRİKS” ölkələri kimi Fələstinin tanınması təklifi ilə çıxış etdi. Bütün bunlar ondan xəbər verir ki, tezliklə Türkiyə də bu təşkilatın tərkibində olacaq.  Türkiyə XİN başçısı Hakan Fidanın dediklərinin arxasında çox ciddi addımlar durur...”

 

Sultan Laçın