“Gürcüstanda vəziyyət bəlli deyil. Guya ki orada qərbpərəst və rusiyapərəst qüvvələr arasında seçim gedir. Ancaq hesab edirəm ki, oradakı rusiyayönlü adlanan hökumətə tam “rusiyapərəst qüvvə” də demək mümkün deyil. Sadəcə olaraq onlar Ukraynanın seçmiş olduğu nümunədə tam Qərb modelini qəbul etmək istəmirlər. Hər halda belə bir görüntü var. Yəni Tiflisdəki siyasi böhran onunla bağlıdır ki, orada ukraynasayağı, qərbyönlü yola tərəfdar olanlar da var, ona qarşı çıxanlar da”. 

Bu fikirləri Moderator.az-a açıqlamasında qonşu Gürcüstanda baş verən son ictimai-siyasi proseslərdən bəhs edən sabiq baş diplomat Tofiq Zülfüqarov dilə gətirib.

 

“Təəssüflər olsun ki, Ukraynanın təcrübəsi, əslinə qalsa, mənfi bir təcrübədir. İndi, “Ukraynadakı hazırkı savaşda kim günahkardır” məsələsi başqa bir mövzudur. Amma baş verənlər göstərir ki, birbaşa qərbyönlü siyasət seçimi də müsbət nəticələr vermir. Bu o demək deyil ki, bunun əvəzinə postsovet ölkələrinin hamısı  sırf rusiyayönümlü siyasət yürütməlidir. Əslində Rusiyanın apardığı siyasət də tamamilə cəlbedici siyasət deyil. Konkret Gürcüstana gəldikdə, mən burada yeni bir yolun axtarışını görürəm: nə sırf Qərb, nə də Rusiya yolu, yəni dövlətin milli maraqlarına uyğun orta bir yol. Baxaq görək, Gürcüstanda hökuməti idarə edən hazırkı iqtidar öz tutduğu siyasi xətti müdafiə edə biləcək, yoxsa yox. Bu məsələ hələki sual altındadır. Amma Ukraynada baş verən hadisə və proseslərin nəticəsi göstərir ki, bəlkə də Gürcüstanda xalqın əksəriyyəti deyilən üçüncü yola üstünlük verəcək”, -deyə davamında politoloq bildirib.

 

“Təəssüflər olsun ki, Azərbaycanda da bəzi siyasi şərhçilər deyirlər ki, ölkə konkret olaraq ya Qərb, ya da rusiyayönlü yol seçməlidir. Ancaq mən bu təbliğat tezisini qəbul etmirəm. Artıq dediyim kimi, proseslər göstərir ki, Gürcüstan kimi biz də başqa bir yol seçmək üzrəyik. Və Azərbaycanda bu seçim artıq bəllidir: cənab Prezident demişkən, Türk Dövlətləri Birliyi artıq bizim ailəmizdir və strateji seçimimiz məhz bu istiqamətdədir. Gürcülər konkret hansı yolu seçəcəklər bu hələ də sual altındadır”, - deyə keçmiş xarici siyasət idarəsi rəhbəri yekunlaşdırıb.

 

Sultan Laçın