Burada təbiət hələ də silah “qusur”...

Bugünlərdə Qarabağ iqtisadi rayonunda tərk edilmiş Ermənistan silahlı qüvvələrinə məxsus hava hücumundan müdafiə (HHM) sistemi və döyüş mövqeyinə baxış keçirilib.

Xocalı rayonunda aşkar olunan hərbi obyektdən istismara yararlı "2K11 Kruq" zenit-raket kompleksinin tərkibinə daxil olan "1С32" raketlərin hədəfə yönləndirmə stansiyası, bir neçə "2П24" buraxıcı qurğusu və üzərində "3М8" idarəolunan zenit-raketləri ərazidən müsadirə edilib.

Məlumat üçün qeyd edək ki, bundan öncə də dəfələrlə işğaldan azad edilmiş ərazilərdə çoxlu sayda silah-sursat və hərbi texnika aşkar edilib, silah anbarları və təchizat məntəqələri üzə çıxarılıb. Vətən müharibəsinin 4, lokal anti-terror tədbirlərinin isə 1ildir ki, başa çatmasına baxmayaraq, günümüzdə də Qarabağda atıcı silahlarla yanaşı, raket komplkeksləri, HHM sistemləri, tank və zirehli maşınların aşkarlanması Ermənistanın 30 il ərzində Qarabağ və ətraf rayonları özü böyüklüyündə nəhəng hərbi bazaya çevirdiyini göstərir. Torpaqlarımızı işğalda saxladığı bir qərinəyə yaxın dövr ərzində erməni faşizmi az qala hər dağa, hər daşa, hər ağaca, hər gülə, hər çiçəyə bir silah, bir raket, bir mina “təhkim edib”.  Düşmən mağara və kahaları silah deposuna şevirməklə yanaşı,  təbiətin bağrını yararaq orada gizli hərbi bazalar, atəş və müşahidə mövqeləri inşa edib. Qarabağda silahlanmanın miqyası elə bir həddə çatıb ki, təbiətlə silah-sursat sanki iç-içə girib, süni bir vəhdət halına gətirilib.

Müharibə və anti-terror əməliyyatından aylar, illər keçməsinə baxmayaraq, işğaldan azad edilmiş ərazilərdə - çətin coğrafi relyefə malik bölgələrdə hələ də düşmənə aid texnikaların aşkar edilməsi təbiətin bu gün də silah “qusduğunu” göstərir. Təbiət 30 ildir ki, onun qoynunda məskən salan bu nəhəng ölüm mexanizmdən, ölüm vasitələrindən qurtulmağa, təmizlənməyə, öz əzəli ilkinliyinə və saflığıma qayıtmağa çalışır. Bu işdə ana təbiətə kömək edən yenə də Azərbaycan Ordusu, Azərbaycan dövləti, Azərbaycan insanıdır.

Şübhəsiz, yaxın gələcəkdə Qarabağ silah-sursatdan, mina və döyüş texnikalarından tam təmizlənəcək, yenə əvvəlki kimi füsunkar və təhlükəsiz olacaq. Lakin erməni faşizminin təbiətə münasibətdə sərgilədiyi vəhşilik, onu silahların əsirliyində saxlamaq səyləri əsrlər sonra da ikrahla yad ediləcək, nifrətlə xatırlanacaq.

Seymur ƏLİYEV