“Mən neçə ildir ki, Ququşu görmürəm. Doğma xalam qızıdır. Onun xalası Fəxri mənim anamdır. Hamı kimi onun haqda bütün məlumatları instaqram sosial şəbəkəsində, saytlarda oxuyuram, müsahibələrini izləyirəm. Bilirəm ki, hazırda bir neçə ölkədə vida konsertləri verir. Əvvəl Bakıda yaşamışıq, 1977-ci ildə İrana getmişik. İndi isə Təbrizdə yaşayıram”

 

Bunu Moderator.az -a özəl açıqlamasında əslən azərbaycanlı olan dünya şöhrətli müğənni Ququşun xalası qızı Nuşin Tavakkol deyib. O daha sonra Ququşla son görüşlərini belə xatırlayıb.

“Mən Ququşu Amerikaya getməmişdən öncə görmüşəm. Gəlib bizi görürdü. Bizimlə çox mehriban idi. Təxminən 25 il öncə. Ququşun o zaman 45 yaşı var idi. Mən ondan 6 yaş kiçiyəm. Anam da, atam da sağ idi. Anamla gözəl əlaqəsi var idi. Anam hər cümə gedirdi ora, görüşürdülər, telefonla danışırdılar. Amma mən yox. Anamdan sonra heç bir əlaqəm olmadı. O biri xalamqızı, yəni Ququşun bacısı Roya ilə danışıb, ondan soruşmuşam. Ququşun bir xalası, bir də dayısı var idi. Qohumu kim adama düzəldər?! Ana! Xalamızdan, Ququşun anasından bir o qədər də məhəbbət görməmişik. Ququşun bu dəqiqə heç bir qohumu ilə əlaqəsi yoxdur. “Uzun gecə” filminə çəkiləndən sonra bir çox qohumu onunla əlaqəni kəsdi. Həmin filmdə Ququş öz həyatını oynayırdı. Ququş 18 yaşından İran şahının şəxsi müğənnisi olub. Onların sevgili olduğu iddiaları yayılandan sonra ailəsi ondan üz döndərib. O da qohumlarından imtina edib. Hətta doğma bacı-qardaşlarından da” deyə o bildirib.

Nuşin xanım arzusunu da dilə gətirib.

“Kaş Ququşu heç olmasa bir dəfə görərdik. O bizi tanıyacaq. O bəlkə də bilir ki, qohumları onu axtarır, çox istəyir. O bizi görsə çox kövrələcək. O bəlkə də bilmirdi və istəmirdi ki, hər şey bu cür olsun. Ən böyük arzumuz budur” deyə Nuşin Tavakkol bildirib.