“Yaxın gələcəkdə görəcəyik ki, Rusiya Fransa ilə Azərbaycan-Ermənistan şərti sərhədində hansısa birgə missiya yaratmaq təşəbbüsü ilə çıxış edəcək. Baxarsız... Yəni yeni bir “Münsk qrupu” peyda olacaq”.

 

Bu gözlənilməz versiyanı Moderator.az-a açıqlamasında sabiq baş diplomat Tofiq Zülfüqarov ifadə edib. 

 

“Axı Fransa ilə Rusiya münasibətləti hazırda bir-biri ilə, az qala, hərbi qarşıdurmaya girmək ərəfəsində görünür? Bu, necə baş tuta bilər?” sualını həmsöhbətimiz belə cavablandırıb:

 

“Yadımıza salaq ki, Fransa prezidenti Makron ötən il Qranadada dedi ki, biz Azərbaycanla Ermənistan arasında sərhədlərin müəyyən edilməsi haqqında danışıqların keçmiş SSRİ ordusu baş qərargahının xəritələri əsasında aparılmalı olduğunu hesab edirik. Bu nə deməkdir? Makron bunu deməklə Moskvaya mesaj göndərdi ki, məni dəvət edin bu məsələ ətrafında müzakirələrə, mən də  Azərbaycan-Ermənistan sərhədlərinin Rusiyanın təqdim etdiyi xəritələr üzrə  müəyyən edilməsi üzrə danışıqlarda iştirak etməyə hazıram. Kimsə elə başa düşməsin ki, Rusiya ilə Fransa ömürlük küsüblər bir-birlərindən... Belə deyil... Moskva ilə Paris, eləcə də Moskva ilə Vaşinqton arasında diplomatik təmaslar, danışıqlar davam edir... Həm Azərbaycan-Ermənistan, həm də Ukrayna ilə bağlı... vaxtilə 2021-ci ildə Makron dəfələrlə Moskvaya zəng edib ki, məni də Putin vasitəşik etdiyi Qarabağla danışıqlara buraxın... Yəni üç dövlət başçısı: İlham Əliyev, Paşinyan və Putin görüşəndə... Amma Rusiya Fransaya bu imkanı vermədi.  Buna rəğmən mən yenə deyirəm, hansısa mərhələdə Rusiya Fransanı da buraxacaq Azərbaycan-Ermənistan sülh prosesinə... Çünki Rusiyaya beynəlxalq izolyasiyadan çıxmaq vacibdir. Və bu minvalla fransızlarla ruslar Azərbaycan-Ermənistan məsələsində hansısa yolla dil tapacaqlar. İndi də mehriban gəzirlər Azərbaycan-Ermənistan sərhədində... Yəni Avropa Birliyinin patrulluq edən missiyasının tərkibindəki fransızlarla həmin sərhədin  müəyyən hissələrində yerləşmiş ruslar bir-birinə güllə atmırlar. Bizim bəzi “mütəxəssis”lər də deyirdilər ki, onlar arasında silahlı toqquşma olacaq”.

 

“Axı AB missiyasının nümayəndələri deyirlər ki, Rusiya hərbçiləri bizi fevralın 12-də atəşkəsin pozulduğu Nerkin-And kəndi yaxınlığındakı mövqelərə buraxmırlar?” sualına isə keçmiş nazir belə cavab verib:

 

“Bundan əvvəl buraxıblar axı... Bildiyimiz kimi, 44 günlük müharibədən sonra Ermənistanın özünün xahişi ilə Rusiya “FSB” sərhəd qoşunları Azərbaycanla şərti sərhədin bir neçə məntəqəsində də yerləşiblər. Özü də 1992-ci il Rusiya-Ermənistan sazişinə zidd olaraq... Çünki həmin sazişdə Rusiya qoşunlarının yalnız MDB-nin xarici sərhədləri olan İran və Türkiyə ilə sərhədlərinə yerləşdirilməsi nəzərdə tutulub. Sözüm ondadır ki, AB missiyyasındakı fransızlar və almanlar sərhəddə monitorinq apararkən ruslardan icazə alaraq müəyyən məntəqələrə daxil olurlar. Bir sözlə, avropalılarla ruslar indidən əməkdaşlıq edirlər. Və onlar həmin əməkdaşlığı hansısa mərhələdə rəsmiləşdirəcəklər. Bu qaçılmaz bir şeydir. Bir də gördün, ruslarla fransızların, almanların birgə missiyası Ermənistanla şərti sərhəddə hansısa təxribat yaratdı, qan töküldü və bizə dedilər ki, gələk sülh yaratmaq üçün sizə kömək edək.  Yəni biz bunların hamısını indidən görməli - illüziyalarla yaşamamalıyıq”.

 

Sultan Laçın