"Avropa Parlamentinin və Fransanın Azərbaycana qarşı qərəzli və iftira xarakterli qətnamələrin heç bir əhəmiyyəti və mənası yoxdur, bu kağız parçasıdır və kimlər tərəfindən hansı yolla qəbul etdirildiyi də məlumdur. Avropa Parlamentinin Azərbaycana qarşı bu cür qərəzinin arxasında Brüsseldə yaşayan erməni əsilli Kaspar Karapetyan dayanır. K.Karapetyan trans-milli cinayətkardır və bir çox bölgəlıərdə silah və narkotika ticarəti ilə məşğuldur, onun Avropa Parlamentində və Aİ-dəki bəzi rəsmiləri maliyyələşdirməsi, onların əli ilə Aİ-nin Rusiyaya qarşı almaz biznesinə sanksiya tətbiqinə mane olması (Rusiyadan almazlar Belçikaya gətirilir, orada cilalanır və satılır), Ermənistandan da almazlar eyni qaydada Belçika vasitəsilə cilalanıb satılır. Karapetyanın biznesi bunun üzərində qurulub və AP deputatlarına verilən rüşvətin mənbəyi budur”.

 

Bu barədə Milli Məclisin deputatı Aydın Hüseynov Moderator.az-a açıqlamasında bildirib.

A.Hüseynov qeyd edib ki, Prezident İlham Əliyevin Almaniya biznes nümayəndələrini qəbul edərkən bu iyrənc oyunları ifşa etdi və Avropanın əsil simasını göstərdi:

 

"Cənab Prezident Aİ-nin son addımlarını Azərbaycana qarşı düşməncəsinə, qeyri-düzgün, səhv informasiya və qərəzə əsaslanan addım və ölkəmizin reputasiyasına zərər vermək cəhdi kimi qəbul etdiyini bəyan edərək Avropa ilə əməkdaşlığın qarşılıqlı maraqlar və qarşılıqlı hörmətə əsaslanmalı olduğunu xatırlatdı. Dövlət başçısı mesaj verdi ki, biz yuxarıdan aşağı münasibətləri qəbul etmirik və qəbul da etməyəcəyik. Qarşılıqlı hörmət, maraq əsasında münasibətlər həm Avropa Birliyinə, həm də Azərbaycan fayda verə bilər. Yəni, biz Avropadan üz çevirmək niyyətində deyilik, münasibətlərimizi genişləndirmək niyyətindəyik. Ancaq, yuxarıdan aşağı münasibətlər qəbulolunmazdır. Ələxüsus da indi. Azərbaycana ermənipərəst qüvvələr tərəfindən müxtəlif bəhanələrdən istifadə edərək təzyiq etmək tamamilə qəbulolunmazdır. Prezident İlham Əliyevin Avropa İttifaqının qərəzli mövqeyini sərt şəkildə tənqid etməsi dünya güclərinin Azərbaycanla hesablaşmalı olduğunu göstərir".

 

 

Millət vəkili vurğulayıb ki, Aİ-yə və bütün beynəlxalq ictimaiyyətə bəllidir ki, bu oyunların arxasında Makron kimiləri, Avropa Parlamentində olan islamafob, rasist və türkofob dairələr, sələbçi və neokolonial təfəkkürlü adamla agentlər dayanır. Azərbaycanın Avropa Parlamenti qarşısında heç bir öhdəliyi yoxdur, müasir sələbçilikdir. Qərbin artıq mütləq monopoliya dövrü başa çatır, bu cür populizmin heç bir xeyri olmayacaq. Azərbaycanın aydın və qəti mövqeyi, malik olduğu imkanlar və atdığı addımlar, heç zaman heç kəsdən heç nə xahiş etməməsi, əksinə, ölkəmizə çoxsaylı müraciətlərin olması, üstəlik, Prezident İlham Əliyevin aydın və qətiyyətli mövqeyi, müstəqil daxili və xarici siyasəti dalımızca danışanları da sonradan bizimlə hesablaşmağa vadar edir.