Yadigar Muradov: "Əgər bu xərçəng məni aparmağa gəlibsə, xoş gəlib, hər şeyə hazıram..."

Şuşa Dövlət Musiqili Dram Teatrının direktoru Yadigar Muradovda xərçəng xəstəliyi aşkarlanıb və bu yaxınlarda əməliyyat olunub.

 

Əməliyyatdan sonra Yadigar Muradov Moderator.az-a danışdı. Bizimlə söhbətində xəstəlikdən qorxmadığını bildirdi:

 

"İndi özümü yaxşı hiss edirəm. Hər bir insanının olumu da var, ölümü də. Əgər bu xəstəlik məni aparmaq üçün gəlibsə xoş gəlib. Bir gün yaranan, bir gün getməlidir. Mən nikbin adamam. Hər şeyi olduğu kimi qarşılaya bilirəm, təəccüblənmirəm ki, ay Allah bu nə işi idi mənim başıma gəldi.

 

 Mənim ortancıl oğlum Üzeyir Amerikada “green card” udmuşdu, orda yaşayırdı. Mənə xəbər vermədən 44 günlük müharibəyə həkim kimi gəlmişdi. Amma onu bizim hərbi komissarlıq ordan geri çağırmışdı.  Oğlumu  həkim kimi yox, əsgər kimi döyüşə  göndərdilər. Mən də çox pis oldum. Dedim ay Allah burda bir ölüm varsa, elə məni öldür. Oğlum sağ qalsın. O bir gün görməyib, evlənməyib. O zaman mənə dedilər ki, o sözlərini xatırla. Oğlun müharibədən salamat qayıtdı. Dedilər ki, oğlunu evləndirdin, uşağın qucağına aldın. İndi də yaradan deyir ki, nətərsən? Gəl bəri görək. Bəlkə aparıb sənin ömrünü uzadacaq? Hələ bilmək olmaz, hamısı Allahın əlindədir. Yəni mən xəstəliyə ölüm kimi baxmıram. Hər şeyə hazıram. Birinci Qarababağ müharibəsində 2 dəfə ölümlə üz-üzə gəlmişəm, Allah məni saxlıyıb. Müharibədən sonra 1 dəfə də bizim ansambılın bədii rəhbəri rəhmətlik Nəsib müəllim məni ölümdən qurtarıb. Yəni mənim bu 32 il yaşamağım Allahın mənə əlavə mükafatıdır. İndi yəqin yenə də məni sınağa çəkir ki, görüm Yadigar qorxmur ki? Yox qorxmuram. Amma mən həkimə dedim mənim 65 yaşım var. Necə yəni mən bundan sonra bir 35-cə il də yaşamıyacam ki 100 olsun? Həkim xeyli güldü, dedi ki, sən özüm ölüm yaşayacaqsan, sənin çox görəl əhval ruhiyən var. Həm də həkimin dediyinə görə, orda nə var təmiz deyiblər. Orda ümid olmasa heç bu şüadı, yoddu bunu verməzlər. Deyərlər gedin hazırlaşın. Ona görə mən daxilən pis baxmıram. Mən hər şeyə həmişəki kimi hazıram".