Putin həlak olanların ailələri ilə görüşüb, ağ örpəkli qadınları isə görməzdən gəlib... FOTO/VİDEO

Bizi sosial şəbəkələrdən izləyin:

"Dövlət həmişə həlak olan hərçilərin ailələrinin yanında olacaq"

"Bu görüş bütün səviyyələrdən olan rusiyalı məmurlar üçün aydın siqnal olmalıdır..."

"Rusiyanın iri şəhərlərində səfərbər edilənlərin həyat yoldaşlarının tərxisolunma tələbilə etiraz aksiyası keçirilib..."

Putin həlak olanların ailələri ilə "səmimi" görüş keçirib, ağ örpəkli qadınları isə görməzdən gəlib...

Rusiya prezidenti Vladimir Putin Milad Bayramı ərəfəsində Ukraynada döyüş əməliyyatları zamanı həlak olan hərbçilərin ailələri ilə görüş keçirib.

Moderator.az xəbər verir ki, bu barədə Kremlin mətbuat xidməti məlumat verib. Tədbir Kreml rəhbərinin Novo-Oqaryovodakı iqamətgahında keçirilib.

Prezident Putin qonaqlarını Milad Bayramı münasibətilə təbrik edib və bu bayramı Rusiya xalqlarının qardaşlıq birliyinin ifadəsi adlandırıb.

Putin qeyd edib ki, həlak olanların ailələri ilə görüş rusiyalı məmurlar üçün "aydın siqnal" olmalıdır.

"Bu görüş həmişə və hər yerdə istənilən səviyyəli hakimiyyətdə, idarəetmədə olan mənim həmkarlarımın sizin yanınızda olmalı olduğuna, zərurət olduğu təqdirdə sizə dəstək verməli, yardım etməli olduğuna siqnaldır...

Mən indi bayram ərəfəsində ailələriniz üçün incə, ağır şeylərdən danışmayacağam. Amma sizi bir daha əmin edirəm ki, biz həmişə sizin yanınızda olacağıq", - o, deyib

Həlak olanların dul qadınları "xüsusi hərbi əməliyyat" iştirakçılarına və onların ailələrinə sistemli dəstək göstərilməsi ilə bağlı məsələləri qaldırıb. Həmçinin prezidenə meydana çıxan konkret problemlərdən danışıb.

İştirakçı qadınlardan biri Rusiyada "hərbi ruhanilik" təsisatının yaradılması barədə düşünməyi təklif edib. Putin cavabında deyib ki, bu barədə Rus Pravoslav Kilsəsinin mövqeyini anlamaq lazımdır.

"Kilsə dövlətdən ayrı olmaq istəyir, dövlətdən asılı olmaq istəmir. Biz buna dəstək veririk, ona kömək edirik, amma onların işlərinə qarışmırıq", - dövlət başçısı deyib.

Görüş zamanı Putin elə həmin gün səfərbər edilənlərin həyat yoldaşlarının Moskvada, Sankt-Peterburqda, Voronejdə, Rusiyanın digər şəhərlərində keçirdiyi aksiyaları şərh etməyib.

"Evə aparan yol" hərəkatının fəalları ağ örpəyə bürünərək (Argentinada hərbi diktatura illərində repressiyaya məruz qalanların həyat yoldaşları və anaları belə örpəyə bürünüb) Kreml divarı yanında Naməlum əsgərin Məzarına əklil qoyub. Bundan başqa, bəzi qadınlar tərxisolunma tələbi ilə təkbaşına piket keçirib.

"Evə aparan yol" hərəkatının iştirakçıları üzdəniraq "xüsusi hərbi əməliyyat"ın əsgərlərin həlak olmasına gətirib çıxardığını Kremlə xatırlatmaq qərarına gəlib.

"Mənə elə gəlir ki, hansısa məqamda səfərbər edilənlər qalmayacaq. İkinci səfərbərlik dalğası olacaq, buraya artıq başqalarının ağ örpəkdə olan həyat yoldaşları gələcək, biz isə onlara, Allah eləməsin, qara yaylıqlarda dəstək verəcəyik", - bunu səfərbər edilənlərdən birinin qohumu bəyan edib.

Moskvadakı aksiyada cəmi 15 nəfər qadın iştirak edib. Sankt-Peterburqda hərəkat iştirakçıları Əbədi Məşəl kompleksinə əklil qoyub.

"Mülki insanlar evdə olmalıdır!" - Voronejdə aksiya iştirakçılarından biri "Sota" nəşrinin müxbirinə deyib. Onun oğlu hazırda Ukraynaya qarşı döyüşür.

O, deyib ki, qadınlar yaxın zamanlarda hakimiyyətdən cavab gözləmir, lakin buna baxmayaraq, "asan olmasa da", tərxisolunmaya nail olmağı planlaşdırır.