“Aygünün bu istəyini mən həyata keçirəcəm, o da xoşlamazdı ki...”-bacısı AÇIQLADI+FOTO

Bizi sosial şəbəkələrdən izləyin:

“Biz bacımızı yox, anamızı, böyüyümüzü itirmişik. Danışmaq həqiqətən də çətindir. Aygün üçün tək qohumları yox, bütün xalq, millət ağlayır. Dünən Aygün dünyasını dəyişməzdən öncə haqqında ölüm xəbərləri çıxdı. O vaxt komada idi. Hələ vəfat etməmişdi. Hazırlanıb ki, Bakıya gətirilsin, sonra dünyasını dəyişib. Bacım, bacımın həyat yoldaşı cənazənin yanındadır. Bakıya gətirilməsi haqda hələ ki, heç bir məlumat verə bilmərəm. Çünki biz özümüz də gözləyirik, xəbərimiz yoxdur. Ola bilsin ki, bazar günüdür, orada bəzi qurumlar işləmir. Bu baxımdan düşünürəm ki, cənazə gecikir. Gec gətirilsə böyük ehtimalla dəfn sabah olacaq. Çünki axşam dəfn etməzlər”

Bunu Moderator.az-a Aygün Bəylərin bacısı Zümrüd Hümmətova deyib. O daha sonra əlavə edib.

“Biz şou adamı deyilik. Xoşlamırıq, sevmirik ki, ölümündən efirlər, sosial şəbəkələr şou yaratsın. Bacım da efirə çıxırdı, mahnısını oxuyub çıxıb gedirdi. Hətta ona qalmaqallı suallar ünvanlayanda belə efiri tərk edib gedirdi. Bu bizim qanımızda var. Ona görə də Aygünün bu istəyini mən həyata keçirəcəm. Aygün özü də sağ olsaydı istəməzdi ki, kimsə onun ailəsini, yaxınlarını görüntüləsin. Bu tezliyində onu itirəcəyimizi düşünməzdim. Qəbirüstündə gedib məşhurları çəkib, danışdırsınlar. Amma qapımızda çəkiliş etməsinlər. Bəlkə elə qohum var ki, vəzifədə işləyir, o düşmək istəmir? Jurnalistlər onu niyə məcbur kamerada görüntüləməlidir ki? Bu etik qaydalara riayyət etmələrini xahiş edirəm” deyə bacısı bildirib.

Zümrüd Hümmətova bildirib ki, sənətə onun xeyir-duası ilə gəlib.

“Aygün uşaq yaşlarında toylarda nağara çalıb, ailəsini dolandırırdı. Ən böyük bacımız idi. Biz 5 bacı, 6 qardaşıq. Aygün bizi ailə başçısı kimi saxlayırdı. Biz bacılarına qarşı mühafizəkar idi, bəzənməyə icazə verməzdi. Ondan icazəsiz evdən çıxıb harasa gedə bilməzdik. Hamının dərdinə yanırdı. Ata-anamın son günlərinə qədər onları gözəl yaşatdı. Qızı Canan həyatına gələndən sonra tamam başqa oldu. Onun üçün yaşayırdı. Allah balasını qorusun (ağlayır). Bacılarımızın hamısına səs Aygündən keçib. Mənə də oxuma və efirə çıxmaq icazəsini Aygün verib. Aygün razılıq verəndən sonra mən efirə çıxmışam. Deyə bilmərəm ki, onun kimi oxumuşam, sadəcə onun kölgəsində oxuyurdum. Aygünün mahnıları bir çox ölkələrdə məşhurdur. Onun sənətinin axırı yox idi. Azərbaycan incəsənəti böyük sənətkarını itirdi” deyə sənətkarın bacısı Zümrüd bildirib.