Rauf Arifoğlu: "Rəsulzadəyə göstərilən bu diqqət Cümhuriyyətimizin tarixinə, bayrağa, Müsavat adına, ideyalogiyamıza edilən hörmətdir"

Bizi sosial şəbəkələrdən izləyin:

Məhəmməd Əmin Rəsulzadənin 140 illiyi qeyd ediləcək. Belə ki, Prezident İlham Əliyev Məhəmməd Əmin Rəsulzadənin 140 illiyinin qeyd edilməsi haqqında sərəncam imzalayıb.

Sərəncamda 2024-cü ilin yanvar ayında görkəmli ictimai-siyasi xadim, Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin anadan olmasının 140 illiyi tamam olması münasibəti ilə silsiləli tədbirlər keçirilməsi haqqında göstəriş verib.

Günün aktual mövzusu ilə bağlı tanınmış media kapitanı, "Yeni Müsavat" Media Qrupunun rəhbəri Rauf Arifoğlu fikirlərini Moderator.az-a bölüşdü. Bildirdi ki, Məhəmməd Əmin Rəsulzadə XX əsrin ilk onilliklərində böhranlı geosiyasi şəraitdə Azərbaycanda müstəqillik idealının gerçəkləşdirilməsi və milli dövlət quruluşunun dirçəldilməsi yolunda böyük xidmətlər göstərmiş şəxsiyyətlərdəndir. Onun istiqlal məfkurəsi öz mənbəyini doğma xalqının çoxəsrlik yaddaşında kök salmış milli azadlıq düşüncəsindən alırdı:

"Prezident İlham Əliyevin Məhəmməd Əmin Rəsulzadənin 140 illiyi ilə bağlı verdiyi sərəncam təqdirdəlayiq bir addımdır. Bu münasibətlə bir vətəndaş, "Yeni Müsavat" Media Qrupunun rəhbəri olaraq cənab prezidentə təşəkkür edirəm. Bildiyimiz kimi Azərbaycan Respublikası Azərbaycan Xalq Cümhuriyyəti varisidir. Biz varis olaraq bu Cümhuriyyətim qurulmasında iştirak edən, əməyi keçən hər bir kəsə yüksək sayqılarımızı hər zaman bildirmişik. Azərbaycan dövləti də bu prosesdə ötən əsrin əvvələrində yaxından iştirak etmiş soydaşlarımızla daima qürur duyub, onlara diqqət göstərib. Məhəmməd Əmin Rəsulzadəyə göstərilən bu diqqət Azərbaycanın, Cümhuriyyətimizin tarixinə, bayrağa, Müsavat adına, ideyaloğiyamıza edilən hörmətdir. Əminəm ki, il ərzində bu yöndə yüksək səviyyədə tədbirlər keçiriləcək. Bu sərəncamdan irəli gələn addımlar atılacaq. Azərbaycan dövlətini, xalqını təbrik edirəm.

Bizim Şərqdə çox böyük dövlət ənənəmiz var. Şərdə ilk cümhuriyyət Azərbaycanda qurulub. Azərbaycan xalqı demokratik, dünyəvi, insani dəyərlərə hər zaman açıq olub. Bunu da tarix boyu sübuta yetirib".