“2023-cü ildə Azərbaycanda yaşanmış bu mühüm hadisə keçmiş SSRİ-də yeganə belə olaydır...”

Bizi sosial şəbəkələrdən izləyin:

“2023-cü il bütün Azərbaycan xalqı üçün önəmli bir il kimi başa çatmaqdadır. Doğma Qarabağımız erməni işğalçılarından tamamilə azad edildi və insanlarımız Xankəndi zəfərinin də şahidi oldu. Əslində böyük bir dövrü əhatə edən işğaldan xalqımız, nəhayət ki, xilas ola bildi”.

Bu fikirləri Moderator.az-a açıqlamasında tanınmış araşdırmaçı və tarixçi, professor Nəsiman Yaqublu “Daha bir ilimiz də tarixə dönmək üzrədir. Bir tarixçi kimi ötən 2023-cü ilə necə qiymət verirsiz? Azərbaycan üçün ötən ildə tarixi-siyasi baxımdan ən yadda qalan və önəmli hadisə hansı oldu?” sualını cavablandırarkən ifadə edib.

“Əgər biz Qarabağın işğalı tarixini XIX əsrin əvvəllərindən, yəni Kürəkçay, Gülüstan, Türkmənçay müqavilələrinin nəticələrindən başlasaq, onda əldə etdiyimiz uğurların miqyasının daha geniş olduğunu görərik. Və unutmasaq ki, keçmiş SSRİ məkanında bu, yeganə hadisədir ki, dondurulmuş problem həll edilir, onda bu hadisənin əhəmiyyətinin daha da böyüklüyü aydın nəzərə çarpar. Məsələn, bilirik ki, Rusiya-Ukrayna savaşı davam edir, Gürcüstan Abxaziya və Osetiyanı itirib və hələ geri qaytara bilməyib, Moldovada Dnestryanı bölgə geri qaytarılmayıb və s. Bir sözlə, 2023-cü ildə Azərbaycanda baç vermiş bu mühüm hadisə, yəni torpaqlarımızın işğaldan azad edilməsi və separatizmin kökünün kəsilməsi həm də postovet məkanında yeganə belə hadisədir””, - deyə davamında tarixçi vurğulayıb.

“Bəs dünya üçün 2023-cü ildə ən yadda qalan olay hansı oldu?” sualına isə araşdırmaçı belə cavab verib:

“2023-cü il üçün dünyanın yaddaqalan hadisələri çox olub. Bizim üçün isə, öncə dediyim kimi, ən mühüm hadisə Xankəndi zəfəridir, orada hərbi paradın keçirilməsidir və s. Amma təəssüflər olsun ki, planetimiz üçün bu il yaddaşımızda qalan xoş hadisələr çox azdır. Dünyada Rusiya–Ukrayna savaşı bitməyib və davam etməkdədir, günahsız insanlar bu müharibədə həlak olur. İsrail-Fələstin savaşı da 2023-cü ildə yaddaşımızda acı bir hadisə kimi yaşamaqdadır və təəssüflər olsun ki, bu savaş da bitmədi və hələ davam etməkdədir. İnsanlar isə özlərinin yaratdıqları problemlərin narahatçılığını daha çox hiss etməyə başlayıb...”