Politoloq Armen Ovanisyan hesab edir ki, Paşinyan Rusiyanın fəallığından qorxaraq   Ermənistan Milli Təhlükəsizlik Xidmətini(MTX) ələ keçirib. 

 

Moderator.az xəbər verir ki, erməni siyasətşünas bu haqda “Kavkazskiy uzel” nəşrinə açıqlamasında danışıb.

 

"Paşinyan Rusiya üçün loyal siyasətçidir. Lakin o, Rusiyanın onu daha loyal birisi ilə əvəz edəcəyindən qorxur. Ermənistan hakimiyyəti Gürcüstan-Rusiya sərhədindəki Lars keçidinin son bağlanmasını məhz bu cür şərh edib və öz müdafiəsini maksimum təmin etmək üçün xüsusi xidmət orqanlarını mümkün qədər nəzarətdə saxlamaq çalışır. Dövlət Mühafizəsi Xidmətinin Milli Təhlükəsizlik Xidmətinin tabeliyindən birbaşa baş nazirin tabeçiliyinə keçirilməsi də bu məqsədlə olub”, - deyə A.Ovanisyan bildirib.

 

Erməni politoloq Ermənistanda demokratiya ilə bağlı fikirləri “yanlış” adlandırıb. Eyni zamanda, onun sözlərinə görə, Ermənistanda diktatura da qurmaq olmaz. 

 

"Diktatura bahalı bir həzzdir, onu saxlamaq üçün maliyyə resursları lazımdır. 2018-ci ilin aprelindəki hakimiyyət dəyişikliyinə qədər demokratiya kimi görünən, lakin avtoritarizm elementləri olan hibrid rejim var idi. Hakimiyyət dəyişikliyindən sonra Qərb Ermənistana keçid sistemi olan bir ölkə kimi baxır. Lakin onun hakim qüvvənin seçdiyi templə biz yenidən hibrid rejimə qayıdacağıq”, - deyə A.Ovanisyan diqqətə çatdırıb.

 

S.Laçın