"Biz bu məqsədə istisnasız olaraq dinc metodlarla, diplomatiya yolu ilə nail olmaq niyyətindəyik..."

 

"Söhbət iki ölkə arasında sazişə uyğun olaraq aparılan sülhməramlı əməliyyatın dayandırılmasından deyil, Moldovada qanunsuz yerləşən Rusiya qoşunlarının operativ qrupundan gedir..."

 

Kişinyov Rusiya qoşunlarının Dnestryanı regionundan çıxarılmasına təkid etməkdə davam edəcək.

 

Moderator.az xəbər verir ki, bu barədə Moldova xarici işlər və Avropa inteqrasiyası naziri, baş nazirin müavini Niku Popesku məlumat verib. Məlumatı "interfax.ru" nəşri yayıb.

 

"Rusiya öz qoşunlarını Dnestryanı regionundan çıxarmalıdır. Bu, Dnestryanı münaqişənin sülh yolu ilə həlli üçün əlverişli şərait yaradacaq", - Popesku özünün sosial şəbəkələrdəki səhifəsində yazıb.

 

"İnterfaks"ın məlumatına görə, bu barədə Popeskunun Rumıniya, İspaniya, Çexiya, Danimarka və Fransa xarici işlər nazirləri ilə görüşündə söhbət gedib. Görüşlər Şimali Makedoniyada ATƏT Nazirlər Şurasının sammiti çərşivəsində baş tutub.

 

Popesku məlumat verib ki, görüşlərdə həmçinin Avropa İttifaqı Şurasının qarşıdakı iclası kontekstində Moldovanın Avropa İttifaqına inteqrasiyası məsələləri müzakirə edilib.

 

"Mən həmkarlarıma dəstəyə görə minnətdarlıq etdim və vurğuladım ki, biz bundan sonra da Ukraynaya yardım etməliyik", - Popesku əlavə edib.

 

Bu ərəfədə Moldova Xarici İşlər və Avropa İnterqrasiyası Nazirliyinin mətbuat katibi İqor Zaxarov bəyan edib ki, ATƏT-in Skopyedə keçiriləcək sammitində Moldova nümayəndə heyəti Rusiya qoşunlarının Moldovanın Dnestryanı regionundan çıxarılması barədə rəsmən çıxış edəcək.

 

Fevral ayında Moldova XİN rəhbəri Niku Popesku bu barədə bəyan edib.

 

"Biz ərazimizdə qanunsuz saxlanılan Rusiya qoşunları və silahlarının çıxarılmasına nail olmaq niyyətindəyik. Bu, xarici siyasətimizin həlledici məqsədidir. Lakin biz bu məqsədə istisnasız olaraq dinc metodlar, danışıqlar və diplomatiya yolu ilə nail olacağıq", - nazir bəyan edib.

 

Fevralın 21-də Moldovanın baş naziri Dorin Reçan həmçinin Rusiya qoşunlarının operativ qrupunun Dnestryanıdan getməsinin zəruriliyini bəyan edib.

 

"Moldova bu məsələnin istisnasız olaraq sülh yolu ilə həllini nəzərdə tutan prosesə cəlb edilib. Bu o deməkdir ki, Rusiya öz qoşunlarını çıxarmalı, silahlar və döyüş sursatlarını təxliyə etməlidir. Bu elə demilitarizasiya deməkdir", - Reçan jurnalistlərə deyib.

 

O, dəqiqləşdirib ki, söhbət Moldova ilə Rusiya arasında 21 iyul 1992-ci ildə imzalanmış sazişə uyğun olaraq aparılan sülhməramlı əməliyyatın dayandırılmasından getmir.

 

"Söhbət Moldova respublikasının ərazisində qanunsuz yerləşən Rusiya qoşunlarının min beş yüz nəfərdən ibarət operativ qrupundan gedir. Rusiya dəfələrlə keçmiş 14-cü ordu qalıqlarının çıxarılması üzrə öhdəliklərini təsdiq edib", - Reçan bəyan edib.