Dünən axşamdan Rusiya vətəndaşlığı olan, Rusiya XİN siyahısına uyğun olaraq HƏMAS tərəfindən Qəzzadan azadlığa buraxılan onlarla fələstinli qaçqın Dağıstana gəlməyə başlayıb.

 

Moderator.az xəbər verir ki, bu barədə SİTA agentliyi məlumat verib.

 

Rusiya vətəndaşları olan fələstinli qaçqınların qəbulu Dağıstan regionunun rəhbəri, hakim "Vahid Rusiya" partiyası regional şöbəsinin katibi Sergey Melikovun göstərişi ilə həyata keçirilir.

 

Bu göstərişlərə uyğun olaraq Dağıstan hökuməti Əbdülmüslüm Əbdülmüslümovun rəhbərliyi ilə Qəzzadan təxliyə edilən onlarla rusiyalının yaşayışı və qidalanması üçün 8 milyon rubl (təxminən 90 min dollar-red.) ayırıb. Onlar Dağıstanda istirahət bazalarının birində dövlət hesabına yerləşdirilir.

 

Dünən axşam saat doqquz radələrində 50 nəfərdən ibarət (o cümlədən 20 nəfər həddi-buluğa çatmayan) qaçqınlar qrupu Moskvadan Mahaçqala vağzalına gəlib. Oradan onlar turist bazasına çatdırılıb.

 

Dağıstan hökuməti "Telegram-kanal"da fələstinlilər Əlhəcəl Xəlil və Xalid Avadın normal rus dilində "çoxmillətli Rusiya xalqına və şəxsən prezident Putinə" minnətdarlıq və İsrailin Qəzzada təcavüzünün dəhşətləri barədə sözlərindən iqtibas gətirib.

 

"Biz Rusiya ərazisinə daxil olanda, belə ifadələr eşitdik: "Ruslar özününküləri tənha buraxmır". Bizim bu sözlərdən gözlərimiz yaşla dolub. Nə zamansa biz rus qızları ilə evlənmişik, həyat yoldaşlarımız bizimlədir. Dağıstana hərarətli qəbula görə minnətdarıq. Bizə kömək etmək istəyənlərin sayını görəndə adamın ürəyi dağa dönür", - bunu həmin qaçqınlardan biri deyib.

 

Bu gün günorta saatlarında Mahaçqalaya 27 nəfərdən ibarət (onlardan 14 həddi-buluğa çatmayanlardır) daha bir qaçqın qrupu gəlib, onlar da turist bazasına göndərilib.

 

Yetim qalmış fələstinli uşaqları övladlığa götürmək istəyən Dağıstan ailələrinin çoxlu sayda olmasını nəzərə alaraq Dağıstan hökuməti bəyan edib ki, "uşaqlar arasında yetim olanlar yoxdur, hamısı öz valideynləri və ya qohumlarının müşayiəti ilə gəlib".

 

Bəyanatda həmçinin deyilir ki, "hazırda onlar təhlükəsiz və rahat şəraitdədir və əhalidən əlavə köməyə ehtiyacları yoxdur. Yalnız geyim, ərzaq məhsulları və gündəlik tələbat mallarına ehtiyac duyulur.

 

Bundan öncə xəbər verildiyi kimi, Qəzza bölgəsinin Rusiya vətəndaşlığı olan sakinləri əsasən SSRİ və ya postsovet dövründə keçmiş sovet respublikalarında təhsil alan və Rusiya, Ukrayna və Belarus qızları ilə evlənən yerli ərəblərin həyat yoldaşları və övladlarıdır. Onların ərləri də ailələrin birləşməsi proseduru üzrə Rusiya vətəndaşlığı əldə edib.

 

Ərəblərin rusdilli həyat yoldaşları hələ 10-15 il öncə Şaron rejimi tərəfindən yəhudilər deportasiya ediləndən və bölgədə təməlçilik qaydaları tətbiq edən HƏMAS-ın hakimiyyətə gəlişindən sonra bölgəni tərk edib.

 

Qəzzada son dövrlərə kimi qalan Rusiya vətəndaşlığı olanlar isə yaxşı yerləşmiş və HƏMAS rejiminin dəyərləndirdiyi ərəblər olub. Bunlar əsasən həkimlər, mühəndislər və sovet və postsovet təhsili olan digər mütəxəssislər olub. 

 

Lakin HƏMAS va-banka gedib faktiki olaraq Qəzzanı dağıntılara təhrik edəndən sonra bölgədə qalan bütün əcnəbilər "Rafiah" nəzarət-buraxılış məntəqəsindən keçmək üçün istənilən imkandan yaralanır.

 

Xatırladaq ki, Qəzza bölgəsində HƏMAS-la savaş başlanandan Dağıstan müsəlmanlarından ibarət kütlə Mahaçqala və digər şəhərlərdə yəhudilərın ovuna çıxıb, antisemit tədbirlər həmçinin Qafqazın digər regionlarında da müşahidə edilib.