Moderator.az xəbər verir ki, bu barədə Ukrayna Milli Təhlükəsizlik və Müdafiə Şurasının katibi Aleksey Danilov Kanadada təhlükəsizlik üzrə beynəlxalq forumda bəyan edib. Məlumatı "nv.ua" nəşri yayıb.

 

"Rusiyanın strateji məqsədləri Ukraynanın strateji məqsədlərinin tamamilə əksidir. Bu, Ukrayna dövlətinin məhv edilməsi və "rus dünyası" çərçivəsində Ukrayna etnosuna son qoymaqdır. Kreml bu məqsədlərindən imtina etmək niyyətində deyil, uzunmüddətli müharibəyə hazırlaşır", - o, qeyd edib.

 

Danilovun sözlərinə görə, Rusiya müharibəyə və Qərbin sanksiyalarına uyğunlaşa bilib və hazırda özünün hərbi-sənaye kompleksinə fəal surətdə vəsaitlər yönəldir.

 

Danilov vurğulayıb ki, Rusiya Qərbin sanksiyalarına gözlənildiyindən daha dayanıqlı olub və onun iqtisadiyyatı tədricən hərbi relslərə keçir.

 

"Rusiyada 17 mart 2024-cü ilin prezident seçkiləri Kreml üçün əlamətdar tarixdir. Putinin növbəti "tacqoyma" mərasimindən sonra rejimin  bərkiməsi prosesi baş verəcək və onun əl-qolu açılacaq. 2024-cü ilin prezident seçkilərindən sonra total səfərbərlik mümkündür. Ona görə də Ukrayna və dünya birliyinin müvafiq hazırlığı üçün 3-4 ayı qalıb", - məmur qeyd edib.

 

Danilov vurğulayıb ki, Rusiyanın gələcəyi "dumanlıdır", lakin indiki "imperiya formasında" o, qonşuları üçün, Avropa və bütövlükdə dünya düzəni üçün təhlükə törədir.

 

"Biz hesab edirik ki, təkrar təcavüzün qarşısının alınmasının ən səmərəli üsulu Rusiyanın bir neçə hissəyə nəzarət olunan parçalanmasıdır. Çünki Rusiyanın parçalanması avtomatik olaraq Putin rejiminin demontaj edilməsinə, Rusiyanın suverensizləşdirilməsinə, habelə onun nüvəsizləşdirilməsi və hərbsizləşdirilməsinə gətirib çıxaracaq", - Danilov vurğulayıb.

 

 

Əgər Rusiyanı indi dayandırmasaq, yaxın gələcəkdə Qərb bəzi Avropa ölkələrinin də qoşulacağı mükəmməl "Rusiya-İran-Çin" alyansı ilə üzləşəcək.

 

"Ukraynanı narahat edən odur ki, ayrı-ayrı tərəfdaşlar arasında rusiyalılarla Ukraynada müharibə, atəşkəs və s. barəsində danışıqlar, məsləhətləşmələr, görüşlərin zəruriliyi haqqında diskusiyalar fəallaşmaqdadır. Bütün bunlar Rusiya qarşısında rudimentar qorxudan irəli gəlir", - o, bəyan edib.

 

Danilov vurğulayıb ki, Qərb Rusiyadan çəkinməməli və bu məsələdə Ukraynadan nümunə götürməlidir. Onun fikrincə, qorxu əvəzinə demokratik dünya Rusiyaya "sərt cavab" verməlidir, axı, söhbət geniş mənada "demokratiya ilə tiraniya arasında mübarizə"dən gedir

 

"Rusiya Ukrayna üçün təhlükə, Çin ABŞ üçün əsas təhlükədir, Çin-Rusiya-İran ittifaqı isə bütün dünya üçün təhlükədir. Əgər Qərbin Rusiyaya münasibətində, Rusiyanın özündə dəyişikliklər baş verməsə, o zaman 15-20 ildən sonra dünyanı təkcə KXDR, Çin, İran və Rusiya Federasiyası deyil, bəzi Avropa ölkələrinin də daxil olacağı yeni "şər oxu" gözləyəcək", - Danilov xəbərdarlıq edib.

 

 

Xəbər verildiyi kimi, bu yaxınlarda NATO-nun Avropada qoşunlarının sabiq komandanı Ceyms Stavridis "Bloomberg" nəşrində dərc edilən böyük məqaləsində Ukraynaya "torpaq əvəzinə sülh" prinsipi üzrə sülh sazişi bağlamağı təklif edib.

 

O, nümunə kimi Cənubi Koreyanı göstərib, bu ölkə şimal hissəsi ilə birləşmək şansını itirib, lakin dünyanın ən zəngin və qabaqcıl ölkələrinin birinə çevrilmə şansını qazanıb.

 

Oxşar fikri tanınmış milyardçı İlon Mask da ifadə edib, onun fikirləri Qərb mediasında tez yayılır və böyük sayda tərəfdarları var. O, əmindir ki, Ukrayna əsgərlərinin həlak olmaması üçün öz ərazilərinin geri qaytarılması planlarından imtina etməlidir.

 

 

Xəbər verildiyi kimi, Putin mart ayında özünü yenidən Rusiyanın "prezidenti'" təyin etməyi planlaşdırır. Buna faktiki olaraq bu ilin əvvəlindən hazırlıq başlayıb. Həmçinin bəlli olub ki, Kreml Putinə ən azı 77 faiz səs "yazmaq" istəyir.

 

Bu yolda başlıca çətinliklərdən biri rusiyalıların Ukraynaya qarşı sonu görünməyən müharibədən narazılığı ola bilər. Regional hakimiyyətlərə artıq, nəyin bahasına olursa-olsun, ərlərinin müharibədən dönməsinə çalışan səfərbər edilmiş əsgərlərin həyat yoldaşlarının mitinqlərinə icazə verməmək təlimatları alıb.