Moderator.az gənc müğənni, son zamanlar cəsarətli videoları ilə sosial şəbəkədə əməlli-başlı səs-küyə səbəb olan Ellada Eyvazova ilə müsahibəni təqdim edir. 

 

 

1997-ci il 16 apreldə Bakıda şəhərində anadan olmuşam. Amma doğum haqqında şəhadətnaməmdə tarix səhv yazıldığından, iki dəfə doğum günü qeyd etmək şansım var. 16 və 17 aprel. Bu, məni çox xoşbəxt edir. Ümumiyyətlə, imkan olsa ildə 5-6 dəfə ad günü qeyd edərəm. Fərqli formalarda. Elladanı belə təsvir edərdim – üzügülər, sadə, kaprizli, gənc və istedadlı ifaçı və aparıcı. Həm də influenser.

 

 

 

Gənclik yaşa baxmır, ruh halına baxır. Ona görə əminəm ki, 40 yaşında da, 50 yaşında da bur uh halımı qoruyub saxlamış olsam, yenə də özümü gənc hiss edəcəm. Bizim cəmiyyətdə belə bir fikir var, “30 yaşa kimi nə elədin, elədin. 25 yaşına qədər ailə qurdun, qurdun. Daha sonra gecdi”. Amma dünyada belə bir şey yoxdu. Çoxlu səyahət edirəm, insanlarda tanış oluram. 46 yaşında insan qab yuyaraq pul qazanmağa başlayıb, başqa ölkəyə köçüb. Qab yumaqla yanaşı həm də fəhləlik edib, başqa bir peşəyə yiyələnib. Hazırda çox öndəgedən biznesmenlərdən biridir. Təbii ki, mənə çətindir. Amma mən özümə motivasiya verə bilirəm. Səbəblər tapa bilirəm.  

 

 

 

ATV kanalında çox gözəl layihədə işlədim. Bəlkə də deyərdim ki, indiyə qədər apardığım verilişlər içərisində ən sevdiyim idi. O verilişdə küçə musiqisi ilə məşğul olan gəncləri tapıb, musiqinin dilinin olmadığını sübut etmişəm. Bir-birindən gözəl, istedadlı gənclərlə tanış olmuşam. Heç zaman efirdə olmayan insanları efirə gətirmək şansım olub, onların sevincinə səbəb olmaq məni xoşbəxt edirdi. Bu missiyanın sona çatdığını düşünmürəm. Bu tərzdə layihəni daha böyük bir formatda ərsəyə gətirib və daima gənclərə dəstək olmağa çalışacam. 

 

 

 

Son zamanlar çox cəsarətli videolarla gündəm olmusunuz. Yanlış anlayanlar çoxdu?
 

“Son zamanlar yaptıklarıma bakma nolursun…” (gülür) 

Bəli, son zamanlar çox cəsarətli videolarla gündəmdəyəm. Çünki bu cəsarəti özümdə tapa bilirəm. Mən, ilk növbədə, bir aktrisayam, gənc aktrisa.İncəsənət insandan sevgi, güc və ən böyük qorxularının üzərindən atlanmasını gözləyir, tələb edir. Əgər sən zirvəni fəth etmək istəyirsənsə.Hər kəs oxuyur, hər kəs danışır,hər kəsin gözəl nitq qabiliyyəti ola bilər, bizdən yaxşısı da, zəifi də var. Amma iz qoymaq, gündəmdə qalmaq istəyirsənsə, gündəmi zəpt etmək üçün hər şeyə hazır olmalısan. Cəsarət olmalıdır. Geyindiyin libası daşıya bilməlisən. Mən düşünürəm ki, geyindiyim libası daşıya bilirəm. Çünki ilk növbədə, savadım, təhsilim, ailəmdən aldığım tərbiyə, həyatdan aldığım dərslərim mənə atdığım addımların arxasında dayanmağa əsas verir. Yazılan şərhlərə reaksiya vermədən keçə bilirəm. Çünki, fərq etməz pis və ya yaxşı şərhlər, onlar mənim üçün önəmlidir. Onlar məni irəli aparır. Mən özümü bu dalğaya hazır bildiyim vaxtda o addımı atdım.  

 

 

Ümumiyyətlə, mənim istifadə etdiyim hər kəlimədə bir ismarıc var. İstəyir orda yumor olsun, ya olmasın. Mən satiranı sevən insanam. Və sözlərdən çox böyük zövq alıram. Mənim xətrimə dəymək istəyən insan bir kəlimə ilə də bunu edə bilər. Çünki kəlimələrin mənim üçün əhəmiyyəti çox böyükdür. Əgər insan dərk edirsə… Bir halda ki, çox qarışıq kütlə içərisindəyik, hər bir insan müəyyən obraz şəklində yaşayır günümüzdə. Mən bəzilərinin gizli şəkildə yaşadığı obrazı niyə sətiraltı da olsa canlandırmayım?

 

 

 

Səhhətimdə çox böyük problemlərim var. Öhdələrindən çox böyük uğurla gəldiyim problemlər… İradəmin, inamımın, Allahımın köməkliyi ilə… Mən uşaqlıqda- 9 yaşımdan 15 yaşıma qədər əlil arabasında qalmışam. 26 yaşım var amma 26 dəfədən daha çox yeriməyi yenidən öyrənmişəm. Yıxılanda insanların necə balta vurduğunu çox yaşamışam. Hər şeyin öhdəsindən tək gəlirəm. Deməzdim ki, bu mənim seçimimdir. Sadəcə, mənimlə bu çətin həyatı paylaşacaq insanla rastlaşmamışam. Mən insanlara heç zaman “nəyə ehtiyacın var?” deməmişəm. Çünki, 26 yaşım olsa da, insana baxanda bilirəm nəyə ehtiyacı var və ona kömək edib, sevindirirəm. Güclü olmaq lazımdır. Əgər məqsədlərin varsa…

 

 

 

Öncəki zamanlarda bizim dillər əzbəri olan mahnılarımız, sevə-sevə dinlədiyimiz müğənnilərimiz olub. O zamanda indiki qədər imkanlar yox idi, studiyalar az idi. Amma rəqabət az idi. İndi imkanlar geniş olduğu qədər rəqabət də çoxdur. Düzdü, studiyalarda güclü iş ərsəyə gətirəcək gənclərin olmamasından gileyliyəm. İnsanlar Rahat yolla pul qazanmaq istəyir. Qeyri-adi iş ərsəyə gətirməyə çəkinirlər. “Az olsun, bu dəqiqə olsun” deyirlər. Amma mən o insanlardan deyiləm. Dayanmadan çalışan, öz üzərimdə işləyən insanam. Ona görə böyük bir komandaya ehtiyacım var, düşünürəm. Hələki o böyük komandanın əvəzinə tək özüm işləyirəm, işimdə çox məsuliyyətliyəm. Gündəm səndən daima yenilik istəyir. 

 

 

 

 

Anjelina Coli kimi olmaq istəyirəm. Bütün dünyaya insanların haqlarını qoruyan, qadınların, həmçinin uşaqların köməklik göstərə bilən bir sima olmaq istəyirəm. Çünki özüm əlilliyin nə olduğunu çox gözəl bildiyim üçün, elə bir imkana sahib olmaq istəyirəm ki, elə bir yer aça bilim ki, orda çalışan insanlar əlilliyi olan insanlar olsun, eyni zamanda, özlərini çox mənalı, gərəkli yerdə hiss edə bilsinlər. Hansısa fiziki qüsuru olan insanlara cəmiyyətdən təcrid olmadığını hiss etdirmək istəyirəm. Onların qazancının olmasını, bu şəraiti yarada bilmək istəyirəm. Buna görə yaxın gələcək üçün arzum bir videomda 67 milyon izləməni qazanmaqdır. Maddi imkan olaraq, ilk milyonumu qazanmaq istəyirəm. Nəğd şəkildə bunu əlimdə görmək istəyirəm. Statusumda 4 pillə də böyümək istəyirəm, influenser kimi xaricdə səhnələr alıb motivativ mövzulara toxunub insanlara güc verəcək həyat hekayələrimi bölüşmək istəyirəm. 

 

 

Gülçin Qorxmaz

Moderator.az