“Hesab edirəm ki, bizi nə Rusiya, nə də ABŞ, Avropa qınaya bilər. Rusiya 1990-cı illərin əvvəli və sonunda Çeçenistana qarşı necə antiterror əməliyyat keçirdi? Tankla, topla, təyyarə ilə nəinki silahlı çeçenləri, dinc insanları da kütləvi şəkildə qətlə yetirdilər. Deməli, Rusiya antiterror əməliyyatı keçirə bilər, Azərbaycan keçirə bilməz?  Və yaxud ABŞ, hansısa Avropa dövləti öz ərazisində silahlı separatçılıq olsa, antiterror əməliyyatı keçirməz. Sözsüz ki, keçirər və heç kəsdən, hansısa beynəlxalq gücdən, təşkilatdan icazə də almaz. Ona görə də ordumuzun son əməliyyatı arzuolunan və zəruri idi... Özü də ordumuz Rusiyanın Çeçenistanda etdiyi kimi, mülki əhalini hədəf almır, yalnız hərbi infrastrukturu və silahlı qüvvələri məhv edir”, -

 

Azərbaycan ordusunun Qarabağın dağlıq hissəsindəki son antiterror əməliyyatlarından bəhs edən keçmiş müdafiə naziri, general-mayor Tacəddin Mehdiyev Moderator.az-a açıqlamasında belə deyib.

 

“10 noyabr üçtərəfli  bəyanatı imzalanandan bəri hamımız deyirik ki, Qarabağdakı separatçı-terrorçulara qarşı antiterror əməliyyatı keçirmək lazımdır. Lakin görünür, dövlətimiz buna uyğun məqamın, vaxtın yetişməsini gözləyirdi. Yəni Azərbaycan səbirlə ermənilərə vaxt verdi ki, bəlkə onlar sülhə, Azərbaycanla inteqrasiyaya  hazırlaşalar. Ancaq son 3 ilə yaxın müddətdə bütün dünya da gördü ki, Xankəndindəki separatçı rejim və onun nəzarət etdiyi minlərlə silahlı terrorçu sülh, barış yaranmasına imkan vermir, Azərbaycanın dinc vətəndaşlarına, polislərə, yol mühəndislərinə qarşı terror aktları həyata keçirirlər. Və artıq bıçaq sümüyə dirəndiyi bir məqamda Azərbaycan ordusu hücuma keçərək sözünü dedi və öz lazımi işini gördü”- deyə general-mayor bildirib.

 

“Belə düşünürəm ki,- sözsüz ki, dövlətimizin və ordumuzun rəhbərliyi bunları nəzərə alıb,- Yuxarı Qarabağın ermənilər məskunlaşdırılmış hissəsini mühasirədə saxlamaqla iş bitməməlidir. Bu gün xüsusən keçmiş Dağlıq Qarabağ daxilində 2020-ci ildən bəri azad etdiyimiz və onlara bitişik ərazilərdə quruculuq işləri gedən, artıq soydaşlarımızın köçürüldüyü və ya polislərin, hərbçilərin, məmurların, onların ailələrinin, mühəndis və fəhlələrimizin yaşadığı məntəqələrimizin təhlükəsizliyini təmin etməliyik. Xüsusən də Şuşa, Laçın, Ağdam, Füzuli, Hadrut və s. kimi məntəqələrimizin təhlükəsizliyinin təminatı çox vacibdir”- deyə Tacəddin Mehdiyev diqqətə çatdırıb.

 

“44 günlük savaşdan bəri sizinlə söhbətlərimizdə dəfələrlə vurğulamışdıq ki, hələlik 37 kənd bir qəsəbəsindən rəsmən yalnız bir kəndi - Daşaltının azad olunduğu Şuşa rayonunun mərkəzinin, Şuşa şəhərinin, orada quruculuqla məşğul olan vətəndaşlarımızın təhlükəsizliyinin təmin olunması üçün Rusiya “sülhməramlı”larının nəzarətində qalmaqla faktiki separatçıların əlində olan ətraf kəndlər mütləq ordumuz tərəfindən nəzarətə götürülməlidir. Çünki Şuşadan hava xətti ilə minaatan atəşi üçün də çox yaxın məsafədə olan erməni quldurları fürsət düşən kimi şəhərə zərbə endirib orada faktiki yaşayan hərbçi, polis və mülki vətəndaşlarımızın həyatı üçün təhlükə törədə bilərlər. Və son antiterror əməliyyatı zamanı, təəssüf ki, bu, özünü göstərdi. Şuşaya minaatanlardan atəş açıldı, bir neçə bina zədələndi və Şuşa Dövlət Qoruğunun əməkdaşı olan mülki vətəndaş da həlak oldu. Odur ki, Şuşanın ətrafındakı separatçı postları ləğv olunmaqla, silahlılar tərksilah olunmaqla yanaşı, hər kolun, hər daşın altı, hər dəlmə-deşik qarış-qarış yoxlanmalıdır ki, nə vaxtsa yenə də təxribat törətmək üçün düşməni heç bir silah-sursatı, imkanı qalmasın. Bundan əlavə, hesab edirəm ki, dövlətimiz tezliklə  Şuşanın ətrafındakı strateji məntəqərələri, o cümlədən Kərkicahan qəsəbəsinin nəzarətə götürülməsini təmin etməyi də nəzərdə tutub ki,  Azərbaycan vətəndaşları əvvəllər olduğu kimi, indi də Ağdamdan  Əsgəran və Xocalıdan keçməklə birbaşa Şuşaya gələ bilsinlər. Həmçinin Tərtər-Ağdərə-Kəlbəcər yolunun da açılmasının təşkili strateji vəzifələrdəndir”,- deyə sabiq nazir müavini vurğulayıb. 

 

Sultan Laçın