Sentyabrın 21-də ABŞ-da rəsmi səfərdə olan Ukrayna prezidenti Vladimir Zelenski Vaşinqtona gəlib.

 

Moderator.az xəbər verir ki, bu barədə "life.ru" nəşri yazıb.

 

Məlumatda deyilir ki, prezident artıq ABŞ Konqresinin yerləşdiyi Kapitoliyə gəlib. Burada, gözlənildiyi kimi, onun Nümayəndələr Palatası və Senatda respublikaçılar və demokratların liderlərilə özəl görüşləri baş tutacaq.

 

Bu gün həmçinin Zelenskinin senatorlarla görüşü olacaq (bu görüş Senatın Köhnə zalında bağlı qapılar arxasında keçəcək).

 

Nümayəndələr Palatasında demokratların lideri Xakim Ceffris Zelenskini Kapitolidə müşayiət edib. Nümayəndələr Palatasının spikeri, respublikaçı Kevin Makkarti səfər ərəfəsində bəyan edib ki, Zelenski ilə qanunvericilər və komitə sədrlərinin ikipartiyalı qrupu ilə görüşü planlaşdırılır.

 

"Mənim Zelenskiyə suallarım olacaq", - Makkarti deyib və dəqiqləşdirib ki, Ukrayna qüvvələrinə yardım xərclərinin artırılması müzakirə edilməzdən öncə ABŞ-ın Ukraynaya verdiyi vəsaitlərin istifadə edilməsinə dair daha çox məlumat əldə etmək niyyətindədir.

 

Makkarti həmçinin deyib ki, Zelenskinin qələbə planının nədən ibarət olduğunu bilmək istəyir.

 

Zelenskinin səfəri ərəfəsində ABŞ Milli Təhlükəsizlik Şurasının spikeri Con Kirbi bəyan edib ki, prezident Amerika qanunvericilərini ABŞ tərəfindən Ukraynaya həyati vacib olan dəstəyin davam etdirilməsinə inandırmaq qabiliyyətinə malikdir.

 

"Konqres üzvləri üçün bilavasitə prezidentdən əkshücum zamanı nə ilə üzləşdiyini, öz məqsədlərinə necə nail olduğunu və bunlara nail olmaqda davam etmək üçün nələrə ehtiyacı olduğunu eşitmək çox vacibdir", - Kirbi jurnalistlərə deyib.

 

Zelenskinin özü səfər barəsində məlumat verərkən qeyd edib ki, bu gün "Vaşinqtonda mühüm danışıqlar" baş tutacaq və  "əsas məsələlər arasında Ukrayna üçün HHM sistemləri olacaq".

 

Qanunvericilərlə görüşdən sonra Zelenskinin Ağ evdə Co Baydenlə görüşü gözlənilir.

 

Ukraynaya yardım və Zelenskinin ABŞ-a səfəri-bunları bilmək lazımdır

 

Ukraynada tammiqyaslı müharibə başlanandan ABŞ Konqresi Ukraynaya ümumi dəyəri 113 milyard dollar olan dörd raund yardımı təsdiq edib.

 

Bu pulların bir hissəsi Amerika hərbi texnikasının ön cəbhəyə göndərildikdən sonra ehtiyatların artırılmasına yönəlib.

 

Ağ ev Ukraynaya dəstəyin gücləndirilməsi üzərində işləyir və Respublikaçılar Partiyası nümayəndələrinin müqaviməti ilə üzləşir.

 

Co Bayden administrasiyası Konqresdən Ukraynanın hərbi və humanitar ehtiyacları üçün əlavə 24 milyard dollar tələb edir.

 

Zelenskinin səfərindən öncə Dövlət katibi Entoni Blinken və kəşfiyyatın yüksək vəzifəli məmurları bu məsələ barəsində qanunvericilərlə görüş keçirib.