Bu gün –15 Sentyabr  Bakının Rusiya-erməni işğalından Qurtuluş günüdür... Daha dərindən düşünsək, əslində bu gün nəinki Bakının, bütövlükdə Quzey Azərbaycan Respublikasının Rusiya imperiyasının müxtəlif adlar qoyulmuş erməni alətləri vasitəsilə işğal cəhdindən Ümummilli qurtulüş günüdür... Təəssüf ki, Osmanlı Türkiyəsinin birbaşa dəstəyi ilə əldə edə bildiyimiz həmin qələbədən cəmi iki il sonra -1920-ci ilin aprelində Rusiya bolşevik imperiyası Quzey Azərbaycanı tamamilə işğal edə bildi... Nəhayət, 71 il sonra -1991-ci ildə bu Şimal Ayısının caynağından hüquqi-siyasi mənada qurtulduq...  

 

*** *** ***

 

Fəqət, gəlin görək,  bu gün – 32 sonra biz əsil mənada Rusiya imperiyasının caynaqlarından qurtulmuşuqmu?.. Nə yazıqlar ki, yox... Qurtulsaydıq, 3 il öncəki 44 günlük müzəffər savaşımızdan, torpaqlarımızın əksər hissəsinin rus-erməni işğalından azad olunmasından sonra belə, Qarabağın dağlıq ərazisinin bir hissəsində, Laçın dəhlizi deyilən ərazidə “sülhməramlı” adı altında işğalçı Rusiya ordusu separatçı-terrorçu xislətli hayları silahlandırıb, himayə edib üstümüzə qısıqırtmazdı. Qurtulsaydıq, Ermənistanla sülh sazişi imzalamamıza imkan tapardıq...  Qurtulsaydıq, Rusiya agenturası, “5-ci kalon”u meydan sulamaz, Milli(!) Ordumuzda bu gün hələ də əlini-qolunu sallayıb keflə gəzən təşkilatçıları cəzalandırılmamış Tərtər qətliamı baş verməzdi. Qurtulsaydıq, xalqın kəskin narazılığına səbəb olan kütləvi rüşvətxorluq, korrupsiya, məmur özbaşınalığı, ərzaq, geyim, yol pulu, aviasiya uçuşları bahalığı, tele-məkanlardan açıq əxlaqsızlıq təbliğatı  və s. davam etməzdi...

 

*** *** ***

 

Bir az dərindən düşünüb anlamaq gərəkdir ki, bu gün bir xalq, dövlət olaraq qurtuluşumuz  siyasi kuluarlarda, mediada Rusiya diktatoru Vladimir Putini az qala, “Azərbaycanın himayədarı”, “xilaskarı” kimi təqdim edib, məhz onun, Kremlin caynağından qurtulmağa çalışan və öz xalqı, dövləti üçün doğrudan da cəsarətli addımlar atan Ermənistan baş naziri N.Paşinyanı hədəf almaqda deyildir. Bu gün qurtuluşumuz əksinə, bizi əsil azadlıq, müstəqilliyə apara biləcək hədəflər naminə Ermənistan hökuməti ilə də, Gürcüstan dövləti ilə də, hətta Çeçenistanın, Dağıstanın, İnquşetiyanın sağlam qüvvələri ilə də ortaq məxrəclərə gələrək Ukraynanın amansız işğalı zamanı əsil sifətini apaçıq göstərmiş Rusiya imperiyasına qarşı gücləri birləşdirib onun ordu, agentura caynaqlarından qurtulmaqdadır... Əks halda öz arsızlığı, həyasızlığı, vicdansızlığı, əxlaqsızlığı, amansızlığı, vəhşiliyi hesabına Ukraynadan tezliklə əl çəkəcəyi görünməyən Şimal Ayısı bu gün Azərbaycanı Ermənistanla, sabah Gürcüstanla, o biri gün Ermənistanı Gürcüstanla savaşdıra-savaşdıra hələ çox qanlar axıdacaq... Hər üç ölkə öz milli maraqlarını Qərbin, ABŞ-ın maraqları ilə uzlaşdırmaqla onların dəstəyi ilə Qafqaz Evi qurmağın bir yolunu tapmalıdır... Bunun üçün isə ilk növbədə hər üç ölkədəki Qərbi, Amerikanı bizə “əsas düşmən” kimi hədəf göstərməyə çalışaraq hökmranlığını davam etdirən imperiya “5-ci kalon”ları agentura şəbəkələri maksimum zəiflədilməlidir...  

 

*** ***

 

Təəssüf ki, real düşünəndə hər üç Güney Qafqaz dövlətinin, hər üç ölkə cəmiyyətlərinin hazırkı durumunda deyilənlər çox çətin başa gələn məsələlərdir. Fəqət, gerçək çıxış yolu bundadır...

 

**** ***

 

Allah 1918-ci ilin mart-sentyabr aylarındakı MİLLİ QURTULUŞ savaşımızın şəhid və qaziləri ilə yanaşı, 1988—ci ildən bəri  müstəqilliyimiz, torpaqlarımız uğrunda canını fəda etmiş on minlərlə şəhidimizə rəhmət eləsin, qazilərimizə şəfa versin! Bu gün dövlətimizin siyasəti ilə yanaşı, məhz onların canı-qanı hesabına Şuşanı, Kəlbəcəri, Qubadlını, Cəbrayılı, Zəngilanı çətinliklə olsa da gəzə bilir, Laçında, Füzulidə və s. yenidən tikilmiş məktəblərimizdə 30-31 ildən sonra ilk Bilik Gününü qeyd edirik...

 

Sultan Laçın