"Hazırda legion USQ-nin tərkibində döyüşür və onun başlıca vəzifəsi Ukraynanın müdafiəsi və ərazilərinin azad edilməsidir, bundan sonra öz evimizi azad etməyi planlaşdırırıq..."

"Rusiya xalqının əksəriyyəti yalnız gücə hörmət edir və biz onlara bu gücü göstərəcək, qılınc qaldıranların ondan yıxıla biləcəyini anladacağıq..."

"Rusiyaya azadlıq" legionunun Kremlin indiki rejiminə qarşı döyüşmək üçün bölməyə daxil olmağı gözləyən minlərlə namizədi var. Könüllülər Moskvaya hücum üçün kifayət qədər çoxsaylı olanadək sərhəd rayonlarına reydlər həyata keçirəcək.

Moderator.az xəbər verir ki, bu barədə Britaniyanın "The Times" qəzeti məlumat verib, qəzetin jurnalistləri şərti adı "Sezar" olan legionun komandiri ilə ünsiyyətdə olub.

"Bizim ciddi arsenalımız var, buraya minaatanlar, zirehli maşınlar, zenit əleyhinə raket kompleksləri, "Stinger", səyyar tankəleyhinə komplekslər və yüksək effektli kəşfiyyat dronları daxildir", - "Sezar" deyib.

Onun sözlərinə görə, şəxsi heyətin sayına görə (250-dən minədək) tabor səviyyəsindədir. Getdikcə daha çox Rusiya vətəndaşları Putin rejiminə qarşı mübarizə aparmağa qərar verdikcə, legionun sayı artacaq.

"Əsl rus oğul və qızların, əsl vətənpərvərlərin bizə qoşulmaq üçün Rusiya ərazisinin bir parçası meydana çıxanadək biz reydlər keçirəcəyik", - "Sezar" jurnalistlərə deyib.

O, vurğulayıb ki, onun döyüşçülərinin hamısı Rusiya vətəndaşlarıdır. Lakin etiraf edib ki, əvvəllər onlar Ukrayna Silahlı Qüvvələrində (USQ) xidmət ediblər.

"Biz cinayətkarlar bandası, "Vaqner" kimi özəl hərbi şirkət deyilik", - o, qeyd edib.

"Sezar" bəyan edib ki, hazırda legion USQ-nin tərkibində döyüşür və onun başlıca vəzifəsi Ukraynanın müdafiəsi və ərazilərinin azad edilməsidir. Ukraynanın qələbəsindən sonra döyüşçülər "öz evlərini azad etməyi" planlaşdırır.

"Sezar"ın sözlərinə görə,  bu yaxınlarda Belqorod vilayətinə edilən reyd USQ-nin əkshücumuna dəstək verməyə, habelə legiona cəlbetmə kampaniyasına kömək etməyə yönəlib. Könüllülər bölməsinin uğurları daha çox rusiyalını Putin rejimini devirməyə sövq edəcək, - komandir qeyd edib.

"Rusiyalılar bizim nümayəndələrimizlə əlaqə saxlaya, tərcümeyi-hallarının ciddi yoxlanışından keçə, seçmə prosesinə cəlb edilə və zəruri hazırlıqdan sonra legion sıralarına qoşula bilər", - "Sezar" deyib.

O, deyib ki, rusiyalılar Ukrayna ərazisinə neytral sərhəd zonasından daxil olur. Oradan fasiləsiz olaraq yeni adamlar gəlir və onların axını daim artır.

"Getdikcə daha çox rusiyalı anlayır ki, bu müharibə cinayətkar müharibədir və onu dayandırmaq lazımdır", - qəzetin həmsöhbəti deyib və qeyd edib ki, Rusiya xalqının əksəriyyəti diplomatiyanı qəbul etmir, yalnız gücə hörmət edir.

"Bu gücü onlara göstərmək lazımdır ki, "qılınc qaldıranların ondan yıxıla biləcəyini" anlasınlar", - "Sezar" vurğulayıb.

O, deyib ki, özü Rusiya ərazisində axtarışdadır, lakin ailəsi Ukraynada təhlükəsiz yerdədir. Özü haqqında deyib ki, Soçidə böyüyüb, sonra Sankt-Peterburqa köçüb, orada 
20 il ərzində fitnes üzrə məşqçi işləyib. Bundan başqa, bir çox sağtəmayüllü qrupların üzvü olub, onların arasında "Rus imperiya hərəkatı" və "Xalq könüllü dəstəsi" var.

"Mən uzun müddət Rusiyanın xüsusi xidmət orqanlarının hədəfində olmuşam. Məni dəfələrlə həbs ediblər, lakin bir dəfə də cəza çəkməmişəm", - o, əlavə edib və güman edib ki, indi Rusiyada buna təəssüf edirlər.