"Bu, iflic olan insanların, baş və onurğa beyni travmalarının nəticələrindən əziyyət çəkənlərin həyatını xeyli yüngülləşdirəcək..."

"Milyardçı, şirkət rəhbəri və on uşaq atasının öz beyninə neyroçip yeritməyə həqiqətən hazır olduğunu zaman göstərəcək..."

"İlon Maskın insan beyninə yeridilən çiplərə əsaslanan texnologiyaları işləyib hazırlayan "Neyrolink" şirkəti insanlar üzərində eksperiment aparmağa icazə alıb.

Moderator.az xəbər verir ki, bu barədə şirkətin nümayəndələri "Twitter"də məlumat verib. Məlumatı Almaniyanın "Business İnsider" nəşri yayıb.

"Bu, ilk mühüm addımdır, zamanında texnologiyamızın bir çox insanlara kömək etməsinə imkan verəcək", - "Neyrolink" hesab edir.

Kliniki tədqiqatda iştirak etmək üçün insanların cəlb edilməsi hələlik açıq deyil. Arzu edənlərin cəlb edilməsi barədə təfərrüatlar sonradan dərc ediləcək.

İlon Mask bu şirkəti altı il öncə yaradıb. 2019-cu ildən o, bir neçə dəfə texnologiyanın insanlar üzərində sınaqdan keçirilməsini anons etsə də, ABŞ qida maddələri və dərman vasitələrinin keyfiyyətinə nəzarət üzrə İdarəsinə sorğular yalnız 2022-ci ilin əvvəlində verilib.

O zaman bu sorğu rədd edilib. Məmurlar bu tenologiyanın bir neçə çatışmazılığını aşkar edib. Əsas problemlər litium batareyaları, implantın elektrodlarının beyin daxilində qeyri-iradi yerdəyişməsi və mikroçipin təhlükəsiz çıxarılması ilə bağlı olub.

"Neyrolink" beyin siqnallarının "Blyutuz" kanalı ilə qulağın arxasında eşitmə aparatı kimi bərkidilən ötürücünün köməyilə ötürə bilən texnologiyaların işlənib hazırlanması ilə məşğuldur. Oradan beyinə
hər biri insan tükündən dörd dəfə nazik olan 1500-dək elektrod gedəcək.

Əgər bu texnologiya gerçəkləşərsə, o zaman insan texnikaya beyindən birbaşa siqnallar ötürərək kompüteri idarə edəcək. Bu, iflic olan insanların, habelə baş və onurğa beyni travmalarının nəticələrindən və müxtəlif xəstəliklərdən əziyyət çəkən insanların həyatını əhəmiyyətli dərəcədə yüngülləşdirəcək.

Bu arada isə bəzi insanlar avtomobilləri alışıb yanan və raketləri partlayan İlon Maskın beyinlərinə çip yeritməsini istəmədiklərini bəyan edib. "İlk könüllülər onsuz da meymunlar olacaq" - sosial şəbəkə istifadəçilərindən biri yazıb.

Bəziləri bu texnologiyanın Maskın əlinə keçəcəyi təqdirdə insanların rifahı üçün istifadə ediləcəyinə inanmır. "Nə onun özünə, nə də onun bağlı olduğu nələrəsə heç bir etimad yoxdur", - başqa bir istifadəçi yazıb.

Bir çoxları keçmişdə baş verən pozuntuları, məsələn, "Tesla" avtomobilinin qəflətən alışıb yanması, yaxud "Neyrolink" şirkətinin öz texnologiyalarını sınaqdan keçirilən yüzlərlə heyvanın həlak olmasını misal gətirir.

Ədalət naminə demək lazımdır ki, milyardçının şirkətinin fəaliyyəti bəşəriyyəti son dərəcə iddialı ideyaların-Marsda həyat, özü idarə edilən avtomobillər, tıxac problemlərinin həlli, habelə insanların internetdə yazdıqlarına görə cavab verməsi kimi ideyaların gerçəkləşməsinə yaxınlaşdırır.

Bəziləri Maska neyroimplantları öz üzərində sınaqdan keçirilməsini təklif edir. Onlara çox gözləmək lazım gəlməyəcək. Dekabrda Mask bəyan edib ki, insanlar üzərində sınaqlar bitdikdən sonra bunu edəcək.

Milyardçı, şirkət rəhbəri və on uşaq atasının öz beyninə neyroçip yeritməyə həqiqətən də hazır olduğunu zaman göstərəcək.