“O vaxt ev, maşın alqı-satqısı maklerlə olurdu, bu gün toy bazarı da maklerlərin əlindədir. Ən böyük maklerlər toy sahəsindədirlər. Ev yiyəsi deyir ki, filankəsi gətir, makler deyir ki, filankəsi neynirsən ki? Filankəs dostumuzdur, bu dəqiqə zəng edim gəlsin. Heç qiymət də deməyəcək sənə. Mənə deyirlər ki, “siz niyə yanınızda prodüsser gəzdirmirsiniz?” Amerikada, İtaliyada, yaxud da 300 min əhalisi olan hansısa dünya ölkələrində yaşamıram ki, yanımda prodüsser gəzdirim. Mən 10 milyonluq xalqın müğənnisiyəm də. Prodüsser gəzdirməklə müğənni əlçatmaz olmur. Müğənninin gərək sənəti, şəxsiyyəti əlçatmaz olsun. 10-15 minə toya getmək əlçatmaz olmaq demək deyil. Bəzən də insanlar müğənniləri qınayırlar ki, baha gedir. Yaxşı edir, əcəb edir baha gedir. Sən ona o pulu verməsən, o necə gedər? Sənə yalvarmır ki, toyuna gəlim. Sən dəvət edirsən, o da gəlir”

 

 

 

 

“Toy üstündə qırğın gedir. Toy deyib dad edirlər. Mən Akif İslamzadədən, Hüseynağa Hadıyevdən bir dəfə də bu sözü eşitmədim. Demək ki, onların məqsədi ancaq toya gedib, pul qazanmaqdır. Deyirlər ki, “filankəs toy tutdu”. Toy balıq deyil ki, tutasan. Yaxşı sənətkar samanlıqda da gizlənsə, gəlib onu tapacaqlar. Bunlar oxumaqdan başqa hər şeyi bacarırlar. Mən toya getmirəm, məni toya aparırlar” deyə müğənni bildirib.

 

 

 

 

“Firuzə xanım mənim illərdir ki, duet ortağımdır. Ondan əvvəl Ruhəngiz Allahverdiyeva, Aygün Bəylər, Nüşabə Ələsgərli mənimlə çalışıb. Söhbət 1988-ci illərdən gedir. Ruhəngiz xanımla 6 ay, Aygün xanımla 5 ay, Nüşabə xanımla 2 ilə yaxın duetlər ifa etmişəm. İlhamə Quliyeva ilə də birlikdə oxumuşuq. Mən 1980-ci illərdə həm qarmon ifaçısı idim, həm də müğənni kimi fəaliyyət göstərirdim” deyə müğənni bildirib.

 

 

 

 

“Flora xanım Kərimova mənim doğma bibim qızıdır. Münasibətimiz çox yaxşıdır. Bəzi insanlar aramıza nifaq salmaq istədilər, hər ikimiz də əsəbləşdik. Flora xanım mənim bibim əvəzidir, xalqın isə çox böyük sənətkarıdır. Mən kiməm ki, Flora xanımdan küsüm? O mənə heç nə etməyib axı! Flora xanımla 6 duet oxumuşuq, dövlət tədbirlərində birlikdə çıxış etmişik. O söz-söhbəti reytinq xatirinə etdilər. Birinci dəfə edəndə başa düşmədim, sonra gördüm ki, söhbət ciddiləşir. Flora xanım dedi ki, “ay Cavanşir, bunlar nə edirlər?” deyə müğənni bildirib.