Bakı Ali Neft Məktəbinin tələbəsi Kanadada təqaüdlə birbaşa doktoranturaya qəbul olunub.
Kimya mühəndisliyi ixtisasının 5-ci kurs tələbəsi Əli Əliyev Kanadanın nüfuzlu Toronto Universitetinin birbaşa doktorantura səviyyəsinə qəbul olunub. O, illik 32 256 Kanada dolları təqaüd qazanaraq Kimya mühəndisliyi və tətbiqi kimya ixtisasında təhsilini davam etdirmək imkanı əldə edib.
Əli Əliyev BANM-ə 2019-ci ildə müsabiqədənkənar qəbul olunub. O, Beynəlxalq Kimya Olimpiadasının qalibi olub.
Əli Əliyev öz uğuru haqda Moderator.az-a danışdı.
“Oxuduğum sahə üzrə ən yaxşı təhsil burda olduğundan BANM-ı seçdim”
Hazırda BANM-da təhsil alan Ə.Əliyev burada ixtisası ilə yanaşı, özünüinkişafla bağlı münbit şəraitin olduğunu bildirdi:
“Bakalavriatura dövründə xaricdə müstəqil yaşamağa özümü hazır hiss etmirdim. Oxuduğum sahə üzrə ən yaxşı təhsil burada olduğundan BANM-ı seçdim.
Xüsusilə, Şimali Amerikada, Avropadan fərqli olaraq,doktorantura təhsili 5 il olur. Avropada 2-3 illik doktorantura dövründə ancaq araşdırmalarla məşğul olurlar.
Amerikada isə araşdırmalarla yanaşı, dərslər, kurs işləri verilir.
Bir növ magistr təhsilini də içərisində saxladığından bakalavriaturadan birbaşa doktoranturaya keçmək olur. Qəbul olduğum Toronto Universiteti də bakalavlar üçün birbaşa doktoranturaya giriş proqramı elan etmişdilər. Açığı, qəbul olunacağıma inanmırdım. Cavab gəldikdə həqiqətən çox sevindim. Kanadadan başqa, Amerika və Almaniyaya müraciət etmişdim. İlk olaraq Kanadadan cavab gəldi. Digərlərindən cavab gəlsə də, qərarımı Kanadadan yana vermişəm.
Özünüinkişafla bağlı BANM da bizə araşdırma imkanı verir. Bunun üçün İTK laboratoriyası da yaradılır. Qrup yoldaşlarımla bir yerdə dərsdən əlavə fəaliyyətlərlə məşğul olaraq, özümümzü inkişaf etdirə bilirik. Birlikdə çox proqramlara, yarışlara qoşuluruq. Bu il də TEXNOFESTƏ sənəd vermişik.
İnsanın uğur qazanmasında intizamla yanaşı, ətraf-mühit də çox önəmlidir. Orta məktəbdə və universitetdə mənim kimi, daha istedadlı həmyaşıdlarımla bir yerdə olmaq daha çox çalışmağım üçün motivasiyam idi. Onlardan da hazırda xaricdə oxuyanlar az deyil”.
“Universitetə göstərmək lazımdır ki, sən həqiqətən qəbul olduqdan sonra vaxtını boşa xərcləməyəcən, araşdırma aparacaqsan”
Ə.Əliyev xaricdə təhsil almaq istəyən tələbələrə öz tövsiyəsini verdi:
“Tələbələrə məsləhətim nə oxumaq istədiklərini dəqiq bilmələridir. Xaricdə təhsil hamı üçün vacib deyil. Bir çox işlər üçün bakalavriatura səviyyəsi kifayət edir. Magistr və doktotranturaya sərf etdiyi illəri işləyərək daha yaxşı yerə gələ bilər. Yox, əgər təhsil istiqamətinə getmək istəyirlərsə, universitetləri dərindən araşdırmalıdırlar. Dünyada və onların təhsil metodları birbirindən fərqlənən bir çox universitet var. Bu metdolar, universitetin tələblərini dərindən araşdırmalıdır. Sənədlər içərisində ən vacibi motivasiya məktəbunu hazırlanmasıdır. Universitetə göstərmək lazımdır ki, sən həqiqətən qəbul olduqdan sonra vaxtını boşa xərcləməyəcən, araşdırma aparacaqsan. Tələbələrə məsləhətim bakalavrın ilk illərindən araşdırmağa başlasınlar.
Doktoranturanı bitirdkdən sonra vətəndə elm sahəsində fəaliyyət göstərmək istəyirəm. Bundan Əlavə özəl şirkətlərdə araşdırma sahəsində çalışa bilərəm. Ölkədə elmin inkişafında rol oynamaq istəyirəm. Təhsilimi bitirənə qədər burda münbit şəraitin olacağına ümid edirəm”.
Rəna Nəbi