Bu gün  xəbər çıxdı ki,  Azərbaycan Respublikası Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin əməkdaşları Rusiya "sülhməramlı" qüvvələrinin müvəqqəti yerləşdiyi Azərbaycan ərazilərinə keçərək Xocalıda sülhməramlı qüvvələrin qərargahında "sülhməramlı"ların komandanlığı ilə sözügedən ərazilərdə faydalı qazıntıların separatçı rejim tərəfindən qanunsuz istismarının aparıldığı yataqlarda və müvafiq digər məntəqələrdə monitorinq, əmlakın inventarizasiyası və ekoloji araşdırma işlərinin vacibliyi barədə müzakirələr aparıblar.

 

Bu olay yeniyetmə yaşlarından beynimi məşğul edən bir mövzunu yenidən yadıma saldı. Həmin mövzu barədə bu yaxınlarda Ekologiya və Təbii Sərvətlər Nazirliyi nəzdindəki Dövlət Mineral Xammal Ehtiyatlarından İstifadə Agentliyinin İdarə Heyətinin sədr müavini Azər Şükürovla da sorğu-sual etmişdim... Elə Azər müəllimlə söhbətimizdə “sülhməramlı”ların nəzarətində olan ərazilərdə ekoloji-geoloji monitorinqin vacibliyi haqda da danışmışdıq...

....Təxminən 1981-1982-ci illərdə, mənim hələ hazırda Laçın rayonunun keçmiş “dəhliz” deyilən ərazisində olan Ağanus kəndindəki orta məktəbdə oxuduğum dövrdə bir dəfə kənd ərazisinə geoloqların gəlməsi xəbərləri yayıldı. Həmin vaxt onlar kəndimizdəki Turşsu mineral bulağı yaxınlığında, eləcə də, Şuşa rayonunun Kiçik Qaladərəsi kəndinə yaxın ərazilərdə də kəşfiyyat işləri aparmışdılar. Və Turşsu yaxınlığındakı dərələrdən birində qazdıqları kəşfiyyat quyusunu bağlayıb, möhürləyib getmişdilər. Geoloqlar gedəndən sonra şayiə yayıldı ki, guya kəndin şimal hissəsində qızıl, cənub hissəsində isə uran yatağı aşkar edilib və buna görə yaxın müddətdə ətraf kəndlərdəki əhali köçürülməlidir... O da yadımdadır ki, Laçın rayonunun Ağanus kəndi ətrafına geoloqlar gəldikdən bir müddət sonra, demək olar ki, bu kənddəki dağın əks tərəfində Şuşa rayonunun qonşu Kiçik Qaladərəsi kəndinə yaxın ərazidə qazıntılar aparılmış, tunel vurulmuşdu. Orada  bizim kəndin gənclərindən də fəhlə kimi işləyənlər vardı. Amma dəqiq bilmirdilər ki, oradan nə çıxarılır, deyirdilər ki, nəsə parıltılı filizlər görünür, onları tuneldən toplayıb naməlum istiqamətə daşıyırlar... Lakin Qarabağda separatçı erməni hərəkatı başlanana yaxın, təxminən 1984-cü ildə işlər dayandırılmış və həmin tunelin ağzı bağlanıb möhürlənmişdi... Mən sonradan, təxminən 1985-ci ildə Kiçik Qaladərəsi kəndi yaxınlığında ağzı bağlanmış tuneli öz gözlərimlə görmüşdüm... Bəlkə erməni mənbələri “Berdzorda 50 milyard dollarlıq qızıl var” deyəndə Laçına yaxın olduğu üçün elə “Berdadzor adlandırdıqları həmin məkanı nəzərdə tuturlar? Görəsən, sovet dövründə Şuşa rayonu ərazisində hansısa filiz, metal yatağı qeydə alınmışdımı? Bu sualla  Ekologiya və Təbii Sərvətlər Nazirliyinin rəsmisi Azər Şükürovla müsahibə zamanı ona da müraciət etmişdik.  Cavabında dağ-mədən mütəxəssisi olan həmsöhbətimiz belə demişdi:

“Xeyr. Rəsmi məlumatlara görə, Şuşa rayonunda belə yataq, mədən yoxdur...”

 

Lakin təkrar edirəm: dəqiq bilirəm ki, hazırkı alternativ Xankəndi-Şuşa-Laçın-Gorus yolunun Şuşa rayonunun hayklar yaşayan Kiçik Qaladərəsi kəndi yaxınlığında,həmin yolun sağ tərəfindəki dağın yamacındakı dərələrdən birində, strateji Ağdaş yüksəkliyi yaxınlığında bir faydalı qazıntı şaxtası,tuneli var...

 

İnşallah, haqqında danışdığımız, bu gün Xocalıda "sülhməramlı"larla görüşmüş monitorinq qrupu sözügedən əraziyə keçə bilsə, mütləq həmin tuneli tapmalı, onunla ciddi maraqlanmalıdır...

 

Gələn yazılarımızda həmin tuneldə işləmiş şəxslərdən bir neçəsinin şahidi olduqlarını nəzəriniə çatdırmağa çalışacağıq...

 

Sultan Laçın