“DTX-nın antiterror tədbirləri peşəkar fəaliyyət, yüksək məsuliyyət və çeviklik tələb edən mühüm dövlət xidmətidir”

“Azərbaycan Respublikası Dövlət Təhlükəsizliyi Xidmətinin müxtəlif ölkələrdə eyni vaxtda həyata keçirdiyi antiterror tədbirləri və nəticədə bir qrup şəxsin saxlanılması bir daha göstərir ki, müasir dövrdə dövlət təhlükəsizliyinin təmin olunması yalnız ölkə daxilində deyil, beynəlxalq müstəvidə də ardıcıl və peşəkar fəaliyyət tələb edir”.

Bunu Moderator.az-a açıqlamasında millət vəkili Azər Badamov bildirib. Millət vəkili DTX-nın son əməliyyatının önəminə diqqət çəkib, bu əməliyyatla bağlı vacib nüanslara toxunub:

“Belə əməliyyatların əhəmiyyəti nədən ibarətdir? Əvvəla, söhbət dövlətin və vətəndaşların təhlükəsizliyinə yarana biləcək təhdidlərin vaxtında müəyyənləşdirilməsindən və qarşısının alınmasından gedir. Terrorçuluq və onun maliyyələşdirilməsi ilə mübarizədə əsas məqsəd yalnız artıq törədilmiş cinayəti araşdırmaq deyil, mümkün terror aktının baş verməsindən əvvəl təhlükəni aşkar etmək və zərərsizləşdirməkdir. Bu baxımdan qabaqlayıcı antiterror tədbirləri ictimai təhlükəsizliyin qorunmasının mühüm elementlərindən biridir.

Azərbaycan son illərdə dövlət müstəqilliyinin, ərazi bütövlüyünün və suverenliyinin təmin olunması istiqamətində mühüm nəticələr əldə edib. Ölkənin bütün ərazisində konstitusion hüquq və dövlət idarəçiliyinin bərpası yeni təhlükəsizlik reallıqları yaradıb. Belə bir şəraitdə əldə olunmuş sabitliyin qorunması və dövlət təhlükəsizliyinə yönələ biləcək yeni təhdidlərin qarşısının alınması xüsusi əhəmiyyət daşıyır.

Bu gün dünyanın müxtəlif bölgələrində müharibələr, silahlı qarşıdurmalar, terror aktları və mülki insanların həlak olması ilə müşayiət olunan proseslər davam edir. Belə mürəkkəb beynəlxalq təhlükəsizlik mühitində ölkə daxilində ictimai-siyasi sabitliyin qorunması dövlət üçün strateji əhəmiyyət daşıyır. Sabitliyin qorunması isə yalnız hər hansı təhlükə yarandıqdan sonra ona reaksiya verməklə deyil, həmin təhlükələrin əvvəlcədən müəyyənləşdirilməsi və qarşısının alınması ilə mümkündür.

Məhz bu baxımdan DTX-nın terrorçuluğa, radikal dini qruplaşmalara, dövlətə qarşı yönəlmiş cinayət əməllərinə və digər təhlükələrə qarşı həyata keçirdiyi tədbirlər mühüm əhəmiyyət kəsb edir. Təhlükəsizlik orqanlarının peşəkar fəaliyyəti nəticəsində potensial təhlükələrin vaxtında aşkarlanması və hüquqi müstəviyə çıxarılması dövlətin təhlükəsizlik sisteminin mühüm göstəricilərindən biridir”.

Millət vəkili qeyd edib ki, DTX-nın əməliyyatının eyni vaxtda bir neçə ölkənin ərazisini əhatə etməsi antiterror tədbirinin  miqyasından xəbər verir:

“Xüsusilə diqqətçəkən məqamlardan biri əməliyyatların bir neçə ölkənin ərazisini əhatə etməsidir. Bu fakt terrorçuluğun və transmilli cinayətkarlığın artıq bir ölkənin sərhədləri ilə məhdudlaşmadığını göstərir. Belə şəraitdə təhlükəsizlik orqanlarının beynəlxalq əməkdaşlığı, informasiya mübadiləsi və müxtəlif ölkələrin ərazilərində həyata keçirilən hüquqi prosedurlar çərçivəsində fəaliyyət göstərməsi mühüm əhəmiyyət daşıyır.

Əməliyyat zamanı Azərbaycan və xarici ölkə vətəndaşlarının gizli təşkilatlanma, terrorçuluğa hazırlıq, terrorçuluğun maliyyələşdirilməsi, cinayətkar birlik yaratmaq və digər ağır cinayətlərlə bağlı məsuliyyətə cəlb olunması barədə məlumatlar təhlükəsizlik məsələsinin nə qədər çoxşaxəli olduğunu göstərir. Burada söhbət yalnız terror aktının icrasından deyil, terror fəaliyyətinin təşkilati, maliyyə və digər təminat mexanizmlərinin müəyyənləşdirilməsindən gedir.

Müasir dövrdə terrorçuluğun maliyyələşdirilməsində yeni texnologiyalardan, o cümlədən kriptovalyuta və rəqəmsal maliyyə alətlərindən istifadə imkanlarının araşdırılması da xüsusi əhəmiyyət daşıyır. Təhlükəsizlik orqanlarının bu istiqamətdə fəaliyyət göstərməsi dövlət maraqlarının dəyişən texnoloji mühitdə də qorunmasının vacibliyini ortaya qoyur.

DTX əməkdaşlarının həyata keçirdiyi bu cür əməliyyatlar arxasında, ilk baxışdan görünməyən böyük bir peşəkar əmək dayanır. Uzunmüddətli müşahidələr, məlumatların təhlili, əlaqələrin araşdırılması, maliyyə axınlarının izlənilməsi, beynəlxalq əməkdaşlıq və hüquqi prosedurların ardıcıl şəkildə həyata keçirilməsi belə əməliyyatların mürəkkəbliyini göstərir.

Ən mühüm məqam isə budur: terror aktının baş verməsini gözləməkdənsə, onun hazırlanması mərhələsində təhlükəni müəyyən etmək və qanun çərçivəsində qarşısını almaq insan həyatının və dövlət təhlükəsizliyinin qorunmasına xidmət edir. Bu baxımdan antiterror və əməliyyat-axtarış tədbirlərinin effektivliyi təkcə saxlanılan şəxslərin sayı ilə deyil, qarşısı alınan potensial təhlükələrin miqyası ilə də ölçülməlidir.

Bu mənada DTX-nın peşəkarlığı, çevikliyi və müasir təhlükəsizlik çağırışlarına uyğun fəaliyyət göstərməsi dövlət təhlükəsizliyinin təmin olunmasının mühüm komponentlərindən biri kimi qiymətləndirilə bilər. Dövlətin təhlükəsizliyini qoruyan hər bir əməliyyatın arxasında isə insanların sabah daha təhlükəsiz şəraitdə yaşaması, cəmiyyətin sabitliyinin qorunması və dövlət institutlarına olan etimadın möhkəmləndirilməsi kimi mühüm məqsədlər dayanır.

Azərbaycanın təhlükəsizlik mühitinin qorunması yalnız dövlət qurumlarının deyil, bütövlükdə cəmiyyətin məsuliyyətidir. Dövlət öz növbəsində vətəndaşların təhlükəsizliyini təmin etməli, təhlükəsizlik orqanları qanunun tələblərinə ciddi əməl etməli, cəmiyyət isə terrorçuluq və zorakı ekstremizmə qarşı ayıq-sayıq olmalıdır”.

Millət vəkili vurğulayıb ki, bu cür əməliyyatlar ölkə daxilində sabitliyin və təhlükəsizliyin qorunması baxımından həyati əhəmiyyətə malikdir:

“DTX-nın bu istiqamətdə həyata keçirdiyi əməliyyatlar göstərir ki, dövlət təhlükəsizliyi yalnız sərhədlərin qorunması ilə məhdudlaşmır. Bu, eyni zamanda ölkə daxilində və xaricində yaranan təhlükələrin vaxtında müəyyənləşdirilməsi, onların maliyyə və təşkilati mənbələrinin araşdırılması, qanunun imkan verdiyi çərçivədə qarşısının alınması və nəticədə vətəndaşların həyat və təhlükəsizliyinin qorunması deməkdir.

Bu baxımdan DTX əməkdaşlarının terrorçuluğa və dövlət təhlükəsizliyinə yönəlmiş təhdidlərə qarşı həyata keçirdiyi peşəkar fəaliyyət, yüksək məsuliyyət, hazırlıq və çeviklik tələb edən mühüm dövlət xidmətidir. Dövlət təhlükəsizliyi keşiyində dayanan əməkdaşların bu fəaliyyəti ölkədə sabitliyin və təhlükəsizliyin qorunmasına mühüm töhfə verir”.

Seymur ƏLİYEV