Zelenski NATO sammitinə əvvəlkindən daha inamlı gedir - "Bloomberg"

Bizi sosial şəbəkələrdən izləyin:

Ukrayna prezidentinin mövqeyinin gücləndiyi bildirilsə də, Trampın qeyri-proqnozlaşdırılan davranışı danışıqlar ətrafında suallar yaradır

Ukrayna prezidenti Vladimir Zelenski bu il NATO sammitinə əvvəlki illərlə müqayisədə daha inamlı əhval-ruhiyyədə yollanır.

Moderator.az xəbər verir ki, bu barədə "bloomberg.com" nəşri yazıb.

Zelenskinin əhvalı dəyişib

Nəşrin mənbələrinin sözlərinə görə, o, Donald Tramp və digər NATO liderləri ilə görüşlər öncəsi özünü arxayın hiss edir. Buna səbəb kimi Ukraynanın Rusiya arxa cəbhəsinə və Krıma endirdiyi zərbələr, həmçinin Avropa İttifaqından Kiyevə ayrılan milyardlarla avroluq maliyyə dəstəyi göstərilir.

ABŞ ilə saziş təxirə salınıb

Mənbələrin bildirdiyinə görə, Zelenski ABŞ ilə pilotsuz uçuş aparatlarının istehsalı sahəsində əməkdaşlıq sazişinin imzalanmasını hələlik təxirə salıb. Ukrayna rəsmiləri hesab edirlər ki, Kiyev bununla Vaşinqtondan daha əlverişli şərtlər əldə etməyə çalışır.

Bununla yanaşı, Avropa ölkələri Ukraynanın pilotsuz aparatlar sahəsində qazandığı təcrübənin Zelenskinin danışıqlardakı mövqeyini gücləndirdiyini etiraf etsələr də, Trampın qeyri-sabit qərarları səbəbindən görüşün nəticələri barədə qəti proqnoz vermirlər.

Ötən illə müqayisədə fərqli mənzərə

Nəşr yazır ki, Zelenskinin hazırkı nikbinliyi ötən ilki NATO sammitindən kəskin fərqlənir. Nəşrə görə, Ukrayna ağır 2025-ci ildən sonra mövqeyini müəyyən qədər gücləndirib. Keçmiş britaniyalı hərbi attaşe Con Forman hesab edir ki, NATO ölkələri artıq Ukraynanın müharibəyə tab gətirdiyini və Rusiyaya da təzyiq göstərə bildiyini görürlər.

Bununla yanaşı, nəşr qeyd edir ki, Avropa rəsmiləri Trampın Rusiyaya qarşı təzyiqləri əhəmiyyətli dərəcədə artıracağını hələlik gözləmirlər. Onların fikrincə, Vaşinqtonun yeni sanksiyalar və ya Ukraynaya silah yardımının genişləndirilməsi ilə bağlı konkret addımlar atacağına dair aydın siqnallar yoxdur.