"ABŞ-dan Kremlə sərt xəbərdarlıq: "Strateji fəlakət" dərinləşir" - "Politico"

"Vaşinqton Rusiyanın müharibədə məqsədlərinə çata bilmədiyini bildirir, Avropa isə sülh danışıqlarında daha fəal rol almağa hazırlaşır..."

Rusiyanın Ukraynaya qarşı apardığı müharibə ilə bağlı həm ABŞ-dan, həm də Avropadan Kremlə yönəlmiş sərt mesajlar səslənib. 

Moderator.az xəbər verir ki, bu barədə "Politico" nəşri yazıb.

Vaşinqton Moskvanın müharibədə uğur qazana bilmədiyini vurğulayarkən, Avropa ölkələri danışıqlar prosesində liderliyi öz üzərlərinə götürməyə hazır olduqlarını bəyan edirlər.

"Bu, Putin üçün strateji fəlakətdir"

ABŞ-ın BMT yanında nümayəndəsi kimi çıxış edən Den Neqrea bildirib ki, Rusiyanın Ukraynaya müdaxiləsi Kreml üçün "strateji fəlakətə" çevrilib. Onun sözlərinə görə, Rusiya döyüş meydanında qarşıya qoyduğu məqsədlərə nail ola bilmir, neft emalı zavodları hücumlara məruz qalır və ölkə böyük itkilər verir.

Neqrea vurğulayıb ki, münaqişənin daha da genişlənməsi vəziyyəti dəyişməyəcək, əksinə, Rusiya üçün nəticələri daha ağırlaşdıracaq. Buna görə də tərəflər dərhal hərtərəfli atəşkəs və danışıqlar yolu ilə müharibənin başa çatdırılması istiqamətində addım atmalıdırlar.

Vaşinqtonun çağırışı və müttəfiqlərə mesaj

ABŞ nümayəndəsi BMT üzvü olan bütün dövlətləri Rusiyanın hərbi səylərinə dəstəyi dayandırmağa çağırıb. O bildirib ki, bu müharibənin hərbi həlli yoxdur və davam edən zorakılıq dövrü sona çatmalıdır.

Vaşinqton xüsusilə Rusiyaya pilotsuz uçuş aparatları təqdim edən İranı və Moskva tərəfdən döyüşən muzdluların fəaliyyətinə şərait yaratmaqda ittiham olunan Kubanı qeyd edib. ABŞ hesab edir ki, bu cür dəstək müharibənin uzanmasına səbəb olur.

Avropa danışıqlarda ön plana çıxır

Bu arada Almaniya kansleri Fridrix Mertsin sözçüsü Ştefan Kornelius  bildirib ki, Avropa ölkələri Ukrayna ilə Rusiya arasında mümkün sülh danışıqlarında daha fəal rol oynamağa hazırdırlar. London görüşündən sonra Almaniya, Fransa, Böyük Britaniya və Ukrayna rəhbərləri ABŞ və Avropanın fəal iştirakı ilə birbaşa dialoqun vacibliyini vurğulayıb. 

Avropa liderləri dərhal və tam atəşkəs, etibarlı təhlükəsizlik təminatları və Rusiyanın dondurulmuş aktivlərinin müharibənin nəticələri aradan qaldırılana qədər saxlanılması kimi şərtlər irəli sürüblər. Korneliusun sözlərinə görə, Putini danışıqlar masasına gətirmək həftələr və ya aylar çəkə bilər.

Lakin buna nail olmağın yolu Ukraynanın gücləndirilməsi və Rusiyaya təzyiqin artırılmasından keçir. Avropa paytaxtlarında hesab edirlər ki, Kreml müharibəni davam etdirdikcə Rusiyanın vəziyyəti daha da ağırlaşacaq və Moskvanın manevr imkanları getdikcə azalacaq.