"Tramp Papa XIV Levə sərt hücum etdi, Vatikanla gərginlik böyüyür" - QORDON

"Bu, iki fərqli dünyanın toqquşmasıdır..."

ABŞ prezidenti Donald Tramp Papa XIV Levə qarşı gözlənilməz dərəcədə sərt açıqlamalar verərək onu həm cinayətkarlıqla mübarizədə, həm də xarici siyasətdə zəiflikdə ittiham edib.

Moderator.az xəbər verir ki, bu barədə "gordonua.com" nəşri yazıb.

Trampdan Papa XIV Levə kəskin ittihamlar

Tramp özünün "Truth Social" sosial şəbəkəsində yazıb: "Mən elə bir papanı istəmirəm ki, İranın nüvə silahına sahib olmasını normal saysın. Mən elə bir papanı istəmirəm ki, ABŞ-ın Venesuelaya zərbəsini pisləsin". O, həmçinin Papa XIV Levin ABŞ prezidenti kimi özünü tənqid etməsini qəbul etmədiyini bildirib:

"Mən elə bir papanı istəmirəm ki, xalqın seçdiyi siyasətə qarşı çıxır, halbuki mən cinayətkarlığı rekord aşağı səviyyəyə endirirəm və tarixdə ən güclü iqtisadi bazarı yaradıram". Tramp daha da irəli gedərək Papa XIV Levin seçilməsinin onun amerikalı olması ilə bağlı ola biləcəyini iddia edib və Vatikanı siyasi motivlərdə günahlandırıb.

"Tramp mübahisə etmir, onu idarə edə bilmir"

Vatikan Trampın açıqlamalarına sərt reaksiya verib. Müqəddəs Taxt-Tacın nümayəndəsi, keşiş Antonio Spadaro bildirib ki, bu qarşıdurma sadəcə siyasi fikir ayrılığı deyil, daha dərin bir gərginlikdir. Onun sözlərinə görə, "Tramp Papa ilə mübahisə etmir, o, Papa Levi nəzarət edə biləcəyi dilə qaytarmağa çalışır. Amma Papa güc, təhlükəsizlik və milli maraqlar dilinə sığmayan başqa bir dildə danışır".

Spadaro əlavə edib ki, Trampın hücumları əslində onun narahatlığını göstərir: "Siyasi güc vicdan səsinə qarşı çıxanda, bu çox vaxt onu susdura bilmədiyinin göstəricisidir". Vatikan rəsmisi həmçinin Papa XIV Levin bu qarşıdurmaya daxil olmadığını, bununla belə mənəvi mövqeyini qoruduğunu vurğulayıb: "O, mübahisəyə girmir və məhz buna görə əlçatmaz qalır. Onun azadlığı - silahsız və tərksilahedici azadlığı ən çox narahat edən amildir".

Gərginliyin fonu və Papa XIV Levin mövqeyi

Məlumata görə, Papa XIV Lev son həftələrdə ABŞ və İsrailin İran siyasətini tənqid edən çıxışlar edib və dialoqa çağırış səsləndirib. Bu isə Vaşinqtonda narazılıq yaradıb. Papa özü isə jurnalistlərə açıqlamasında bildirib ki, heç bir tərəfə qarşı siyasi hücum etmək niyyətində deyil:

"Mən münaqişəyə girmək istəmirəm. Mənim sözlərim hücum deyil. Mən insanları sülh və dialoq yolları axtarmağa çağırıram". Hazırkı vəziyyət artıq sadəcə verbal polemika deyil, ABŞ prezidenti ilə Vatikan arasında açıq ideoloji qarşıdurma kimi qiymətləndirilir. Beobserlər isə qeyd edirlər ki, Papa XIV  Lev getdikcə Trampın siyasətinə mənəvi alternativ kimi çıxış edir və bu fərq daha da dərinləşir.