Asiya ölkələrində təbii qaz idxalı son altı ilin minimumuna düşdü

Yaxın Şərqdəki münaqişə fonunda yaşanan yanacaq böhranı səbəbindən Asiya ölkələrinin mayeləşdirilmiş təbii qaz (LNG) idxalı son altı ildə ən aşağı səviyyəyə düşüb.

Moderator.az xəbər verir ki, bu barədə "Bloomberg" agentliyi məlumat yayıb.

Məlumata görə, Asiya ölkələrinin orta aylıq LNG idxalı 2020-ci ilin iyun ayından bəri ilk dəfə 600 min tondan aşağı düşüb. Çinə qaz tədarükü 2025-ci illə müqayisədə 30%, Hindistana isə 20% azalıb.

Agentliyin məlumatına görə, Pakistan mart ayının əvvəlindən bəri yanacaq almayıb, Yaponiya və Cənubi Koreya da tədarükdə altı illik minimuma düşüb.

Məlumata görə, 2020-ci ildə idxalın azalması COVID-19 pandemiyası zamanı Asiyada qaza tələbatın azalması ilə əlaqədar olub.

Agentlik qeyd edir ki, ABŞ və İranın Pakistanda danışıqlar zamanı münaqişənin həlli üçün razılığa gələ bilməməsindən sonra regiondakı alıcılar hazırda uzun müddət davam edən LNG çatışmazlığına hazırlaşırlar.

Dünyada LNG tədarükünün təxminən 20%-i Yaxın Şərqdə yerləşən Qətərin payına düşür və bu ölkənin əsas satış bazarı Asiya ölkələridir. Qətərin dövlət şirkəti - "Qatar Energy" martın 2-də İranın zərbələri səbəbindən Ras-Laffan və Mesaiddə təbii qaz istehsalının dayandırıldığını bəyan edib.