"Papa XIV Lev: dünya "müharibə məntiqindən" imtina etməlidir" - "Deutsche Welle"

"Münaqişələr fonunda Vatikan lideri güc nümayişini deyil, dialoqu üstün tutmağa çağırış edib..."

Roma Papası XIV Lev Vatikanın Müqəddəs Pyotr kilsəsində keçirilən genişmiqyaslı dua mərasimində dünya liderlərini "dayanmağa və danışıqlar masasına əyləşməyə" çağırıb. 

Moderator.az xəbər verir ki, bu barədə "dw.com" nəşri məlumat yayıb.

Sülh üçün dua və qlobal çağırış

Nəşrin yazdığına görə, o, açıq şəkildə bildirib ki, dövlətlər silahlanma planlarının hazırlandığı masalar ətrafında deyil, sülh üçün dialoq qurulan masalarda bir araya gəlməlidir. Pontifik vurğulayıb ki, kilsə hər zaman sülh tərəfdarı olacaq - hətta bu mövqe "anlaşılmazlıq və ya nifrət" doğursa belə.

Onun sözlərinə görə, həqiqi itaət insan hakimiyyətinə deyil, Tanrıya yönəlməlidir. Aprelin 5-də Pasxa münasibətilə etdiyi ənənəvi "Urbi et Orbi" müraciətində elan etdiyi bu dua mərasimi Vatikanın məlumatına görə təxminən 10 min insanı bir araya gətirib.

"Müharibəyə son!" - sərt mesajlar və tənqidlər

Papa çıxışında emosional və qətiyyətli mesaj verib: "Güc nümayişi kifayətdir! Müharibəyə son! Əsl güc həyatın qorunmasına xidmət etməkdədir". O, münaqişə bölgələrindən uşaqların məktublarını xatırladaraq müharibənin insan faciələrinə səbəb olduğunu bir daha ön plana çıxarıb. Eyni zamanda, dini ritorikanın müharibəni əsaslandırmaq üçün istifadə edilməsini sərt şəkildə pisləyib.

"Reuters"-in qeyd etdiyi kimi, bu fikirlər dolayı şəkildə Pit Heqsetə yönəlmiş ola bilər. Belə ki, o, ABŞ və İsrailin İrana qarşı hücumlarını xristian ritorikası ilə əsaslandırmağa çalışıb. Papa həmçinin xatırladıb ki, Katolik kilsəsi 2003-cü ildə ABŞ rəhbərliyində həyata keçirilən İraq müdaxiləsini dəstəkləməyib.

Vatikan və Vaşinqton arasında gərginlik

XIV Lev tarixdə ABŞ-dan olan ilk Roma papasıdır. Lakin maraqlıdır ki, onun mövqeləri Donald Tramp administrasiyası ilə ziddiyyət təşkil edir. "The Free Press"in yazdığına görə, bu gərginliyin əsas səbəblərindən biri pontifikin yanvarın 9-da diplomatik korpus qarşısında etdiyi çıxış olub. O zaman papa "güc üzərində qurulan diplomatiya"dan narahatlığını ifadə edib.

Bundan əvvəl isə Heqset amerikalıları İrandakı müharibədə ABŞ ordusunun qələbəsi üçün dua etməyə çağırıb. Buna cavab olaraq XIV Lev bildirib: İsa Məsih "müharibəni rədd edən sülh kralıdır". Papa son müraciətində də eyni mövqeni təkrarlayıb: "Əlində silah tutanlar, onu yerə qoyun! Müharibə başlatmaq gücündə olanlar, sülhü seçin - zorla deyil, dialoq yolu ilə əldə edilən sülhü!"