"Trampın İran avantürası: hamı uduzdu, yalnız "şər oxu" qazandı" - "Daily Mail"

"Yaxın Şərqdə müharibənin nəticələri və dəyişən geosiyasi balans..."

Yaxın Şərqdə bir neçə həftə davam edən intensiv müharibədən sonra tərəflər arasında kövrək "atəşkəs" yaranıb. Lakin artıq aydın görünür ki, bu münaqişədə qalib və məğlubları müəyyənləşdirmək çətin deyil.

Moderator.az xəbər verir ki, bu barədə "dailymail.com" nəşri yazıb.

Birbaşa iştirakçılar: gözlənilməz nəticələr

Nəşrə görə, əsas iştirakçılar - İran, ABŞ və İsrail fərqli nəticələrlə üzləşib. İran ciddi itkilər versə də, rejim çökməyib, əksinə daha da möhkəmlənib və radikallaşıb. Ekspertlər bildirir ki, nüvə potensialının bir hissəsi qorunub, Hörmüz boğazı üzərində faktiki nəzarət isə Tehranın mövqelərini gücləndirib.

ABŞ hərbi üstünlüyünü nümayiş etdirsə də, Donald Tramp administrasiyası strateji məqsədlərinə nail ola bilməyib. 13 minə yaxın zərbə nə nüvə proqramını dayandırıb, nə də rejim dəyişikliyinə səbəb olub. 

Əksinə, enerji böhranı inflyasiyanı artıraraq daxili narazılığı gücləndirib. İsrailin baş naziri Benyamin Netanyahu tərəfindən irəli sürülən rejim dəyişikliyi ssenarisi də reallaşmayıb və bu, siyasi məsuliyyət məsələsini gündəmə gətirib.

Dolayı qaliblər və məğlublar

Münaqişədə iştirak etməyən Rusiya və Çin isə əsas qazananlar sırasında göstərilir. Sanksiyaların yumşaldılması Rusiyaya əlavə gəlir gətirib, Çin isə həm İranla əlaqələrini gücləndirib, həm də regionda təsirini artırıb. Pakistan da vasitəçilik rolu ilə nüfuz qazanıb.

Əksinə, Avropa ABŞ-la münasibətlərin gərginləşməsi və enerji qiymətlərinin artması səbəbilə zərər görüb. Fars körfəzi ölkələri hücumlar və ixrac məhdudiyyətləri ilə üzləşib, turizm və investisiya cəlbediciliyi zəifləyib.

Asiyanın bir sıra ölkələri isə enerji asılılığı səbəbilə böhrandan mənfi təsirlənib. Nəticədə, nəşr belə qənaətə gəlir ki, bu müharibədə demək olar ki, hamı itirib, yalnız kənarda qalan və vəziyyətdən faydalanan güclər qazanc əldə edib.