"Netanyahunun siyasəti iflasa uğradı": amerikalılar İsraildən üz döndərir" - "The New Statesman"

"İran müharibəsindən sonra ABŞ-İsrail münasibətlərində çatlar dərinləşir..."

İsrailin baş naziri Benyamin Netanyahu Vaşinqtonda Donald Trampı İrana qarşı müharibəyə razı salıb və sürətli qələbə vəd edib. Lakin "Epik qəzəb" əməliyyatı uğursuz oldu: İran hakimiyyəti dəyişmədi, Hörmüz boğazı bağlanmadı, əksinə, Tehran mövqeyini gücləndirdi.

Moderator.az xəbər verir ki, bu barədə Böyük Britaniyanın "The New Statesman" nəşri yazıb.

Uğursuz plan və günahkar axtarışı

İndi Tramp vəziyyətdən çıxmağa çalışır, amma onun mümkün varisləri - Marko Rubio və Cey Di Vens əvvəldən bu müharibəyə şübhə ilə yanaşıb. Rubio hətta İsrailin kəşfiyyat məlumatlarını "cəfəngiyyat" adlandırıb. Məqalədə vurğulanır ki, uğursuzluğa görə günahkar kimi İsrail getdikcə daha çox ön plana çıxır.

Amerikada İsrailə münasibət sürətlə pisləşir

Sorğular göstərir ki, artıq amerikalıların 60 faizi İsrailə mənfi baxır. Bu dəyişiklik hər iki partiyada, xüsusilə də gənclər arasında müşahidə olunur. Demokratlarda Qəzza müharibəsi ciddi dönüş yaradıb. İsrailə qarşı mövqe artıq siyasi testə çevrilib. Senator Kori Buker belə bu mövzuda təzyiqlə üzləşib. Berni Sanders isə açıq deyib ki, İsrail ABŞ siyasətini diktə etməməlidir. Sosial mediada da anti-İsrail mövqeli fiqurlar, o cümlədən Hasan Payker güclənir və bu meyl siyasətə təsir edir.

Sağ düşərgədə də dönüş və riskli gələcək

MAGA düşərgəsində də İsrailə münasibət dəyişir. Əvvəllər dəyişməz sayılan dəstək zəifləyir. Burada əsas fikir belədir: İsrail ABŞ-ın maraqlarına zidd şəkildə onu regional münaqişələrə çəkir. Bu mövqeni Taker Karlson kimi fiqurlar açıq şəkildə yayır. Eyni zamanda, İsrailin İranda rejim dəyişikliyi strategiyasının iflası onun etibarlılığına zərbə vurub.

Hazırda isə vəziyyət daha da gərgindir: İsrail Livanda əməliyyatları davam etdirir və bu, Trampın atəşkəsini risk altına qoyur. Nəticə olaraq, məqalə belə qənaətə gəlir: ABŞ-İsrail "xüsusi münasibətləri" zirvəni artıq geridə qoyub və qarşıda eniş mərhələsi başlaya bilər.