"Sevgi, casusluq və xəyanət: Nyu-Yorkda başlayan gizli oyun necə ifşa olundu" - "The New Voice of Ukraine"

"Rusiya agenti ilə Ukrayna kəşfiyyatçısı arasında münasibət böyük geosiyasi qarşıdurmanın görünməyən tərəfini üzə çıxardı..."

ABŞ-da baş verən bu hadisə klassik casus trillerini xatırladır. Rusiya vətəndaşı Nomma Zarubina uzun müddət Kremlin əleyhdarları haqqında məlumat toplamaq üçün gizli fəaliyyət göstərib.

Moderator.az xəbər verir ki, bu barədə "The New Voice of Ukraine" nəşri yazıb.

Gizli missiya və gözlənilməz tanışlıq

Nəşr yazır ki, onun əsas üsulu isə şəxsi münasibətlər qurmaq və etimad qazanmaq idi. Məhz bu yolla o, amerikalı Sara Eşton-Çirillo ilə tanış olur. İlk baxışdan bu, adi romantik münasibət kimi görünürdü. Lakin sonradan məlum olur ki, Eşton-Çirillo Ukrayna kəşfiyyatı ilə əməkdaşlıq edir və bu münasibət artıq təkcə şəxsi deyil, strateji xarakter daşıyır.

Onların yolları ilk dəfə NATO sammiti çərçivəsində keçirilən görüşlərdən birində kəsişmişdi. Zarubinanın davranışı Eşton-Çirilloda şübhə doğurur və o, bu barədə Ukraynadakı rəhbərliyinə məlumat verir. Beləliklə, şəxsi münasibət paralel şəkildə xüsusi xidmət orqanlarının nəzarətinə keçir.

Sevgi adı altında kəşfiyyat oyunu

Araşdırmalar göstərir ki, Zarubina Rusiya Federal Təhlükəsizlik Xidməti ilə əlaqəli olub və "bal tələsi" kimi tanınan taktika ilə hədəflərinə yaxınlaşırdı. O, həm Rusiyada, həm də ABŞ-da müxtəlif dairələrə daxil olaraq məlumat toplamağa çalışıb.

Digər tərəfdən, Eşton-Çirillonun yolu tam fərqli idi. O, 2022-ci ildə müharibə başlayanda könüllü olaraq Ukraynaya gedib, Xarkovda ərazi müdafiə qüvvələrində xidmət edib, daha sonra isə Ukrayna hərbi kəşfiyyatı ilə əməkdaşlığa başlayıb. Bu münasibəti isə o, nəzarətli əməliyyata çevirir.

Onların münasibəti aylarla davam edir. Bu müddətdə Eşton-Çirillo qarşı tərəfin etimadını qazanaraq mühüm məlumatlara çıxış əldə edir. Zarubina isə əksinə, özü fərqində olmadan məlumat mənbəyinə çevrilir. Maraqlıdır ki, o, işlədiyi sistemə qarşı daxilən simpatiya bəsləmirdi və bəzi anti-Kreml qruplarına rəğbət göstərirdi.

Final: həbs və ifşa olunan sistem

2025-ci ilin sonunda Zarubina ABŞ-da yenidən həbs olunur. İstintaq zamanı onun yalnız vasitəçilik fəaliyyəti ilə deyil, həm də kəşfiyyat tapşırıqları ilə məşğul olduğu üzə çıxır. O, sonda ABŞ istintaq orqanları ilə əməkdaşlıq edərək ona verilən tapşırıqları etiraf edir.

Bu arada, Eşton-Çirillo Rusiyada qiyabi olaraq 20 il həbs cəzasına məhkum edilir. Hadisə bir daha göstərir ki, müasir qarşıdurmalar yalnız cəbhədə deyil, diplomatik görüşlərdə, sosial şəbəkələrdə və hətta şəxsi münasibətlərdə də davam edir.

Bu hekayə sübut edir ki, "sevgi" bəzən sadəcə hiss deyil, həm də alətə çevrilə bilər. Və böyük güclər arasında gedən mübarizədə ən gözlənilməz yerlər belə, o cümlədən insanların şəxsi həyatı gizli savaş meydanına çevrilir.