Yaxın Şərqdəki gərginlik Misir iqtisadiyyatını çökdürdü: Hökumət hərəkətə keçdi

Bizi sosial şəbəkələrdən izləyin:

Misirin paytaxtı Qahirənin mərkəzində Yaxın Şərqdəki gərginlik fonunda artan elektrik enerjisi xərclərini azaltmaq məqsədilə hökumət yeni qərar qəbul edib. Sərəncama əsasən, kafelər, mağazalar və restoranlar hazırda daha tez bağlanacaq.

Moderator.az oxu.az-a istinadla xəbər verir ki, bu barədə "Dawn" qəzeti məlumat yayıb. Yeni tətbiq edilən qaydalara görə, ticarət obyektləri həftəiçi saat 21:00-da, həftəsonu isə 22:00-da fəaliyyətini dayandırır. Kopt Pasxası dövründə bu müddətin 23:00-a qədər uzadılması gözlənilir.

Məlumata görə əvvəllər turistlər və yerli sakinlər gecəyarısına qədər küçələrdə və kafelərdə vaxtlarını keçirə bilirdilər.

Baş nazir Mustafa Madbuli tədbirləri Misirin idxal olunan yanacağa yüksək asılılığı ilə izah edib. Bildirib ki, münaqişə başlayandan bəri ölkədə aylıq enerji idxalı xərcləri ikiqat artaraq 2.5 milyard dollara çatıb. Məlumata görə illik 20 milyard dollarlıq neft büdcəsinin təxminən 60%-i elektrik şəbəkəsinin saxlanmasına xərclənir.

Məlumata görə, kiçik müəssisələr artıq təzyiqi hiss ediblər. Dükan və kinoteatr sahibləri gəlirlərinin 60%-ə qədər azaldığını bildirirlər. Paytaxt Qahirədə məşhur bazarların və tarixi yerlərin erkən bağlanması turizm sektorunda mənfi təsir göstərib.

Bundan başqa hökumət enerjiyə qənaət üçün əlavə tədbirlər də həyata keçirib: yanacağın qiyməti qaldırılıb, bazar günləri distant iş rejimi tətbiq edilib və küçə işıqlandırılması azaldılıb. İqtisadçıların xəbərdarlığına görə, obyektlərin tez bağlanması bütün iş yerlərinin təqribən üçdə ikisini təşkil edən qeyri-rəsmi iqtisadiyyata qeyri-mütənasib şəkildə zərbə vurur. Münaqişənin əvvəlindən bəri Misir funtu dəyərinin təxminən 15%-ni itirib, mart ayında isə inflyasiya səviyyəsi 13.6% təşkil edib.