Əraqçı: "İran Türkiyəyə atılan raketlərlə bağlı birgə araşdırmaya hazırdır"

"Rəsmi Tehran Türkiyəyə doğru İran raketlərinin atılması ilə bağlı Ankara ilə birlikdə araşdırma aparmağa hazırdır".

Moderator.az xəbər verir ki, bunu İranın xarici işlər naziri Abbas Əraqçı türkiyəli həmkarı Hakan Fidanla telefon danışığında bildirib.

"İslam Respublikası mehriban qonşuluq prinsiplərinə, Türkiyənin suverenliyinə, ərazi bütövlüyünə hörmətə sadiqdir və potensial iddiaları yoxlamaq üçün birgə texniki əməkdaşlığa hazırdır", - deyə İran Xarici İşlər Nazirliyi Əraqçının mövqeyini açıqlayıb.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.