"601 günlük hüquqi mübarizə: İspaniyada 25 yaşlı qadına evtanaziya hüququ verildi" - "El Pais"

"Mən istəmirəm ki, kimsə yanımda olsun, istəmirəm ki, gözlərimi yumarkən məni görsünlər..."

İspaniyada 25 yaşlı Noelia Castilyo Ramos 601 gün davam edən hüquqi mübarizədən sonra evtanaziya (ötməzlik) hüququnu reallaşdırmaq imkanına sahib olub. 

Moderator.az xəbər verir ki, bu barədə "El Pais" nəşri yazıb.

Qadının bu qərarının həyata keçirilməsini uzun müddət onun atası məhkəməyə verərək bloklayıb. Nəşr xəbər verir ki, prosedur 26 mart 2026-cı ildə icra olunacaq.

Tibbi və hüquqi təsdiqlər

2024-cü ilin iyul ayında Kataloniya Təminatlar və Qiymətləndirmə Komissiyası qadının müraciətini yekdilliklə təsdiqləyib. Həkimlər onun "düzəldilməz klinik vəziyyətdə" olduğunu, davamlı ağrı və ağır əzab çəkdiyini bildirib. Əvvəl evtanaziya  2 avqust 2024-cü il üçün təyin olunub, lakin Barselona məhkəməsi atasının iddiası əsasında prosesi dayandırıb.

Bundan sonra iş beş məhkəmə instansiyasından keçib və İspaniyada evtanaziya hüququnun məhkəmə yolu ilə mübahisələndiyi ilk iş olub. Barselona inzibati məhkəməsi atanın iddialarını rədd edərək prosedurun qanuni olduğunu təsdiqləyib. Kataloniya Ali Məhkəməsi də qadının belə bir qərar qəbul etmək qabiliyyətinin olmadığı barədə arqumentləri qəbul etməyib.

"Atalarını dəstəkləyən Xristian vəkillər" təşkilatı İspaniya Ali Məhkəməsinə şikayət verib, lakin 2026-cı ilin yanvarında müraciət rədd edilib. Daha sonra Konstitusiya Məhkəməsi müdaxilə etməyib, Avropa İnsan Hüquqları Məhkəməsi isə proseduru dayandırmaq üçün tədbir görməyib. Bu qərarlardan sonra Kataloniya hakimiyyəti evtanaziyanın həyata keçirilməsinə hazırlığı bərpa edib.

Qadının şəxsi açıqlamaları

Prosedurdan bir gün əvvəl Noeliya Castilyo Ramos İspaniya televiziya kanallarına verdiyi müsahibədə bildirib ki, həyatdan ailəsinin yanında olmadan ayrılmaq istəyir: "Mən istəmirəm ki, kimsə yanımda olsun, istəmirəm ki, gözlərimi yumarkən məni görsünlər", - deyə o izah edib. O, həmçinin çətin həyat şəraitindən danışıb.

O, bildirib ki, valideynlərinin boşanmasından sonra 13 yaşında bir müddət Kataloniya hökumətinin himayəsində olub, sonradan bir neçə dəfə seksual zorakılıq və təcavüz hadisəsi yaşayıb. Son insidentdə, onun sözlərinə görə, üç kişi iştirak edib. 2022-ci ilin oktyabrında Noeliya Castilyo Ramos beşinci mərtəbədən yıxılaraq belindən aşağı hissəsini iflic edib. Bu hadisədən sonra o, evtanaziya üçün müraciət edib.

Mübarizənin psixoloji tərəfi

Məhkəmə iclaslarında qadın hər günün onun üçün "əzablı və dözülməz" olduğunu bildirib. O, həmçinin ailə üzvləri ilə qarşıdurmadan danışıb: atası, anası və bacısı onun qərarına qarşı çıxır. Prodedurun Sosial-Tibbi Mərkəzdə (Sant-Pere-de-Ribes) keçirilməsi planlaşdırılır, burada o son vaxtlarda qalırdı. "Xristian vəkillər" təşkilatının qadını psixiatrik müalicəyə göndərmək tələbi də məhkəmə tərəfindən səlahiyyətlərin olmaması səbəbi ilə rədd edilib.